Poshan Maah hman mek zel a ni

September thla chhungin Rastriya Poshan Abhiyan hnuaiah Poshan Maah (Nutrition Month) hman ṭhin a ni a, kuminah pawh tunlai hian Mizoram hmun hrang hrangah hman mek zel a ni.

KVK , Khawzawl buatsaihin Ningani khan KVK training hall-ah Poshan Maah hman a ni a, Khawzawl DC Zothanmawia khuallian niin, anganwadi woker-te leh loneitute an tel a, KVK senior scientist Dr Henry Saplalrinliana'n a kaihruai.

Bawrhsap Zothanmawia chuan, anganwadi naupangte'n ei tur ṭha an dawn ṭhinte hripui léng karah sem chhunzawm zel theih a ni chu lawmawm a tih thu a sawi a, anganwadi enkawltute'n chuktuah huan uar zel se a duh thu sawiin, anganwadi centre bul hnaiah thlai chíng uar turin thawktute a chah.

Poshan Maah puala hun hmanah hian KVK-a mithiamte'n thlai chîn leh enkawl dan ṭhate an zirtir a, anganwadi worker leh loneitute hnenah thlai chi an sem nghal a ni.

KVK, Central Agriculture University, Aizawl pawhin September 17, Ningani khan online kaltlangin Poshan Maah pualin hun an hmang a, Women & Child Development director Vanlalpianpuii'n a hmanpui.

Poshan Maah puala hun hmanah hian thupui chu, 'Poshan Maah - Capacity development of angawadi workers & farm women on Poshan' tih a ni a; official-te bakah, anganwadi worker 73 leh farm women 23 an tel. Anganwadi worker leh farm women-te hnenah hian thlai chi eng emaw zat sem nghal a ni.

Rastriya Poshan Maah chhunga hmalakna eng emaw zat duan a ni a; naupang ṭhanṭhu leh chak lo zualte zawn chhuah, nutri-garden siam, nautête nu hnute hnêktir chungchang inzirtir, chaw dang pek chungchang, tui thianghlim, faina leh thianghlimna chungchang inzir leh, article inziahsiak buatsaihte a tel.

Nutrition Month chhungin Mizoram hmun tina ICDS naupang zawng zawng rih zawng leh sàn zawng lak a, nih tur ang ni pha lote thliar a, a bika chaw ṭha leh enkawlna ṭha pek tum a ni a; Covid-19 léng vanga sorkarin inkaihhruaina a siamna zâwm chungin anganwadi worker-te'n an bawhzui dawn a ni. Nu leh pate pawh a ṭul angin councelling pek a ni ang.

Nutri-Garden (Kan Wadi Huan) project hnuaiah Mizorama anganwadi centre tinah Nutri-Garden siam tura hmalak a ni a, anganwadi centre hmunhma nei lote pawh khawtlang hruaitute leh mi inphalte nen thawkhoin ruahmanna siam a ni. Nutri-Garden hnuai aṭanga huan thlai thar chhuah eng emaw zat a awm tawh a, chu'ngte chu naupangte hnenah sem ṭhin a ni.