YMA, Kawlkulh Group-in an huam chinah dan loa kuhva phurte kal an phal tawh lo

YMA, Kawlkulh Group chuan February 3, Thawhṭanni khan thuchhuah siamin, an huam chhunga kawngahte dan loa kuhva rah phurte kal tlang an remti tawh lo tih an tarlang.

Kawlkulh Group YMA chuan, an huam chhung kawngpuiah tunlaiin kuhva rah phur lirthei tam tham tak an tlân ṭhin tih hriat a nih thu an tarlang a, "Tun ang zela kuhva rah phur motor-te'n an zawh chuan rei lo têah a chhe leh vat thei dawn niin a lang. Thuchhuah siam aṭanga thu leh awm hma chu kuhva rah phur motor-te Kawlkulh Group YMA huam chhungah tlan phal a ni tawh lo," an ti.

An ngenna thuchhuah pawisaloa tlan lui an awm chuan district thuneitute nen inbiakremna angin hmalak a ni dawn tih tarlangin Kawlkulh Group YMA chuan, "Heng kawngpuite hi vantlang mipui tana siam leh ṭangkai taka kan hman mek angin, dan phal loh thil phurte avanga kawngpui a chhiat mai lohna tura kan thuchhuah thlawp turin mipui kan ngen a ni," an ti a; mahni hmazâwn ṭheuha tan lakpui turin mipui an sáwm.

YMA, Kawlkulh Group tarlan danin, Kawkulh leh Hliappui inkar, Balaji-in PMGSY-III hnuaia an siam mekah kawng laih hna zawh thawkhat a ni tawh a, kawng chhuat phah thuai beisei a ni. Kawlkulh-Puilo kawng, SASCI hnuaia siam zawh thar te, Kawlkulh-Dulte inkar by-pass vanga one time improvement tihte chu hmalak mek a ni bawk.