World Cancer Day hman a ni

Nimin kha cancer dona ni, World Cancer Day a ni a, thupui chu 'United by unique' tih niin, Aizawla Taxation Auditorium-ah Health & Family Welfare principal director Dr Vanlalsawma hoin hman a ni. Kum 2023 chhung khan Mizoram State Cancer Institute-ah cancer natna vei mi 2,100 an inziak lut tih tarlan a ni.

Dr Vanlalsawma chuan, cancer veite enkawlnaah enkawltu leh damlo chenpuite an pawimawh thu a sawi a, "Thawktute pawh nasa lehzuala ṭan lak a ngai. Cancer natna hian kiam lam a pan theihna turin mahni invawn kawngah mi tinin ṭan kan lak a pawimawh," a ti.

Inkhawm hi National Health Mission (NHM) mission director Dr Eric Zomawia'n a kaihruai a; MSCI director Dr Jeremy L Pautu, gynecologist oncologist Dr Zirsangliana Chhangte leh NP-NCD nodal officer Dr Catherine Lalmuanawmi ten thu an sawi.

Dr Jeremy L Pautu chuan, MSCI dinhmun sawiin, Mizoramah February 4, 1998-ah cancer enkawlna Cobalt Therapy neih ṭan a nih thu leh TCCC khawl thar February 4, 2024-ah an neih thu a sawi a, "Bul ṭan tirh laite ngaihtuah chuan nasa takin cancer enkawl kawngah hma kan sawn tawh a, cancer case thar hi a ni tèla a pun zel avangin MSCI hi thuam changtlun mek zel a ni,” a ti.

MSCI Director chuan, Japan international Cooperation Agency aṭanga sum hmuh vbc 732 hmangin MSCI thuam chak mek a nih thu leh, hna thawh zawh a hnih hunah chuan cancer enkawlnaah nasa taka hma an sawn dawn bakah, zirbingna (research) tihna kawngah pawh a puih hle dawn thu a sawi.

World Cancer Day hi khawvel pumah kum 2000 aṭangin hman a ni a, Mizoramah chuan kum 2014 khan hman ṭan a ni. Programme kalpuitu National Programme for Prevention & Control of Cancer, Diabetes, Cardiovascular Diseases & Stroke (NPCDCS) chuan Mizoramah Population Based Screening an kalpui mek.

HFW department chuan, kum 2023 chhung khan Mizoram State Cancer Institute, Zemabawkah cancer vei inziak lut mi 2,100 chuang an awm thu a tarlang.