Chak zawka NH siam dan tur sawiho

Kolasib district bawrhsap Robert C Lalhmangaiha hoin nimin khan DC conference hall-ah National Highway no. 306 leh 06 thawm ṭhat hna chak zawka thawh a nih theih dan tur sawiho a ni.

Kolasib DC chuan, thlûr li (four lane) tura kawngpui zauh hna ṭan theih lohna chhante tihfel a nih tawh avangin hna ṭan thuai beisei a nih thu a sawi a, "Kawng siam chhung hian hun a duh rei dawn avangin tuna kan hman mek Mizoram châk lâk luhna ber hi thawm ṭhat a pawimawh. Kan hma lawkah ruahtui a lo tla leh dawn a, chumi hmaa chak taka hna thawh a ngai a ni," a ti.

Pawl (NGO leh JAC) aiawhte chuan, kawng ṭha neih thuai a nih theih nan sorkar chu thawhpui zawm zel an inhuam thu an sawi a; kawng endik hna, monitoring an kalpui ṭhin chu chhunzawm zel ni se an ti.

Ṭhutkhawmah hian Kolasib SP David H Lalthangliana, additional DC B Malsawmtluangi, Kawnpui SDO, PWD Executive Engineer, Kolasib DC office-a officer te, NHIDCL leh an hnuaia contractor - Balaji leh BR Goyal Construction aiawhte bakah, Kolasib YMA Sub-Headquarters leh Kolasib District Truck Owners Association aiawhte an tel a ni.

ṬHUTKHAWMA TARLAN TLANGPUI

☑ BR Goyal Constructions-in Mualkhang leh Khamrang inkarah km. 4 blacktop hna an zo tawh a, enkawl zui (maintenance) hna kalpui zel a ni.

☑ BR Goyal Construction-in kawng an siamnaah hian committee ngenna angin Silchar leh state pawn lam lung chang ṭha hman a ni.

☑ Balaji Construction-in Vairengte leh Bilkhawthlir inkar blacktop hna an ṭan tawh.

☑ Vairengte-Bilkhawthlir leh Kolasib-Kawnpui inkar kawng thawm ṭhat hna March 31, 2025 hmaa zawh theih an inbeisei.

☑ Mizoram PWD-in Bilkhawthlir leh Kolasib inkar bakah, Kawnpui leh Khamrang inkar kawng khuarte hnawh mâm hna an kalpui mek.

☑ Tuihâwk luankawr leh kawng khuar dang ṭhenkhat siamna tur pawisa dilna sorkarah thehluh a ni a, hotute thu ngaihchan mek a ni.