Rúlhût hlo Champhai dist-a mi 54,010 leh Kolasib dist-a mi 31,500 pek tum

Nimin khan Champhai leh Kolasib-ah District Coordination Committe on National Deworming Day (NDD) an ṭhukhawm a; kum 1-19 inkarte hnena rúlhût hlo pek beihpui thlakna National Deworming Day 2025 thawh khatna neih dan tur an rêl. NDD 2025 thawh khatna hi February 10 aṭangin kalpui tur a ni dawn.

Champhai bawrhsap VL Remliana hoa DC conference hall-a ṭhutkhawma tarlan danin, Champhai district-a kum 1-19 inkar mi 54,010 hnenah rûlhût hlo pek tum a ni. Rûlhût hlo hi anganwadi centre leh sikul aṭanga pek tur a ni a, sikul kal lote chu accredited social health activist (ASHA)-te'n an inah kal chilhin an pe ang.

NDD thawh khatna bul ṭan nía rûlhût hlo ei ve hman lote tan February 17, 2025 khian ‘Mop-up Day’ neih tura ruahman a ni a, rûlhût hlo ei avanga harsatna awm theite veng turin Adverse Event Management & Emergency Response Team ruat a ni. Rûlhût hlo ei ṭhatna leh a nghawng ṭha lote inzirtirna beihpui thlak a ni dawn bawk.

NDD 2024-ah khan Champhai leh Khawzawl district huam chhunga naupang 54,177 hnenah rûlhût hlo pek tum a ni a; mahse, pek kim theih a ni lo a, mi 53,908 (99.50%) hnenah pek a ni.

Kolasib-ah chuan senior chief medical officer RK Lalthlamuana kaihhruaiin NDD 2025 thawh khatna kalpui dan tur sawiho a ni a; Koalsib district-a kum 1-19 inkar mi 31,500 hnenah rûlhût hlo, Albendazole pek tum a nih thu tarlan a ni.