Rilru na takin an remhriat danin hmunphiah an hralh - Lal Thanzara

Congress party president Lal Thanzara chuan, khaw tam takah hmunphiah hralhna awm loh avangin mipuiin rilru na takin an remhriat danin hmunphiah an hralh niin a sawi a; ZPM kaihhruai sorkar chu an intiamna ang ngeia kut hnathawktute hnena minimum support price pe turin a ngen.

Lal Thanzara hian nimin khan Congress Kolasib Block-II political training-ah thu sawiin, "Thlai chi li leina tur pawisa dah tawh nia insawi a, a rate hre sa nia insawite'n ruahmanna a la siam fel loh avangin hmunphiah lâk leh hralh hun a liam leh mek. Khaw tam takah hmunphiah hralhna awm loh vangin seng tur pawhin thawh chhuah awmzia a awm lo a, rilru na takin an remhriat dan danin hmunphiah an hralh a ni," a ti.

Nikum 2024-ah ZPM sorkarin hmunphiah rate a tichhia nia sawiin Thanzara chuan, "Hmunphiah hralhna a vawi hnih nan an tihchhiatsak hi kut hnathawktute hmakhaw ngaih lohna lian tak a ni. ZPM sorkarin a intiamna ang ngeiin kut hnathawktute hi minimum support price pe ngei turin ka ngen a ni," a ti a; inthlan dawna ZPM inzawrh dan chu lal duh vanga inbumna a nih thu a sawi.

Lal Thanzara chuan, ZPM chhuahsan rûnpui a thleng mek nia sawiin, "Bél keh phuar khawm sorkar an nih avangin thinlung taka ram tana thawk tura inpawhna leh thawhhona ṭha an nei lo. Mizoram tana sorkar ṭha siam turin mipuiin Congress min ko a, châwl mai mai hman kan ni lo. Mizoram hmun tinah mipui beiseina a taka hlen chhuak ṭhin Congress sorkar siam duha tel ve duhte'n min ko," a ti.

MPCC President hian Bairabi-a rel chawlhhmun a tlawh a, rél aṭanga buhfai phurh thlen dan leh Barabi khaw chhunga NH kawng siam hna thawh mek a en a ni.