KHAWTHLIR

Thisen pe

Govt Aizawl College chuan golden jubilee an lawm mek pualin nimin khan an college-ah thisen pek an huaihawt a, Civil Hospital, Aizawl tan thisen unit 94 an pe a, petute mipa 82 leh hmeichhia 12 an ni. Mizoram Polytechnic, Lunglei NSS & Red Ribbon Club pawhin nimin khan an hmunah thisen pek huaihawtin, Lunglei Civil Hospital tan thisen unit 54 an pe a, petute mipa 46 leh hmeichhia pariat an ni.

Road Safety Month

Lawngtlai District Road Safety Committee chuan nimin khan SDO (Sadar) Margaret J Vanlalremmawii kaihhruaiin Road Safety Month hman dan tur an rêl. Best driver leh best traffic police thlana chawimawina hlan an rel a; a tam thei ang ber surprise checking neih ni se, an ti. Lawngtlaiah hian February 7, 2025-ah Road Safety Month hawn a ni ang.

Kawng khar

Mamit district-a Dárlâk-Tuidam via Sabual lui kawng chu PWD-in nimin aṭang khan thawm ṭhat a ni a; hei vang hian kawngah hian February 4-9, 2025 leh February 14 - March 4, 2025 chhungin lirthei tlan phal loh a nih thu Mamit SP Pukhraj Kamal chuan a tarlang. Kawng khar chhungin NH-44A/108 (kawng thar)-ah lirthei tlan tur a ni a, VC inthlan tur avangin February 10-13 inkarah erawh chuan kawng hawn a ni dawn thung.

Minister-in tlawh

Minister of state Prof. Lalnilawma chuan nimin khan a bial chhunga khaw hrang hrang leh Thingsûl Tlangnuam mite'n Samakbual zau leh Sesih zaua dragon fruit leh balhla an chìnna hmunte a tlawh. Lalnilawma hian VC inthlan awm turah ZPM candidate-te thlang tling turin a bial chhunga mipui a chah a ni.

ZPM-in lawmawm ti

ZPM party chuan thuchhuah siamin, Model Code of Conduct bawhchhiaa puha MNF Gen. Hqrs-in State Election Commission-a an hêk minister of state Lalnghinglova Hmar thiam lohna hmu loa SEC-in thiam a chantir chu lawmawm an tih thu an tarlang.

Exchange for ballot papers neih a ni

Aizawl DC conference hall-ah nimin khan VC/LC inthlanpui lo awm tura inthlana duty turte vote thlakna tur ballot paper sem chhuah leh inthlengna (Exchange for Ballot Papers) neih a ni a; state nodal officer/coordinator V Lalmuanpuii'n a telpui. Exchange for Ballot Papers hunah hian district hrang hranga inthlannaa duty turte hnenah an duty-na hmuna vote an thlakna tur ballot paper hman tur pek chhuah a ni a; an duty-na hmun (district) ṭheuhah vote an thlak theihna turin dilna thehlutte tan ballot paper hi an vote neihna district ṭheuhte'n an buatsaih a ni. Voter on election duty-te hian February 6, 2025 aṭangin an duty-na hmun district ṭheuhah vote an thlak dawn a; hei hian an bial ṭheuha chhiar turin vote thlak tawhna ballot paper chu February 8, 2025-ah Aizawl DC office-ah hlan chhâwn leh a ni ang.

WCD hnuaia hnathawh thlir let

Women & Child Development depart-ment chuan nimin khan Synod Conference Centre-ah Progress Review on Mission Sakhsam Anganwadi & POSHAN 2.0 an ṭan a, vawiinah chhunzawma zawh a ni ang. Review meeting hi Women & Child Development deputy director Sailopari'n a kaihruai a; director Zoramthangi Chhangte-in hawnna thu a sawi a, joint director Zonunpari Sailo-in thawktute fuihna thu a sawi. Review on Mission Saksham Anganwadi & POSHAN 2.0-ah hian Mizorama ICDS project 27 aṭangin an hnathawh dante leh harsatna an neihte sawifiah a ni.