Siaha leh Serchhipah Road Safety Month

Siaha District Road Safety Committee bultumin MADC executive member (Transport) Beirahmo Syhly chuan nimin zing khan Siaha Bazar traffic point-ah Road Safety Month a hawng a; Serchhip bawrhsap Paul L Khuma pawhin nimin khan DC pisa hall-ah Road Safety Month a hawng bawk.

Beirahmo Syhly chuan, lirthei khalhtute leh mipui kea kalte fimkhur tâwk loh vanga thi an awm ṭhin avangin Road Safety Month chu hman ṭhin a nih thu a sawi a, "Road Safety Month hi lirthei khalhtute tan chauha buatsaih a ni lo a, kea kalte tan pawh a pawimawh," a ti a; fimkhur a pawimawhzia hre thar a, rilru leh ngaituahna thar nen ṭangho turin mipui a sáwm.

Inkhawm hi district trans-port officer (DTO) Manesia Khai-meichho-in a kaihruai a, Road Safety Month thutiam sawi rual a ni.

Serchhip DC Paul L Khuma chuan, mahni nunna hlut ang bawkin mi dangte nunna hlut a ṭul thu sawiin, "Lirthei khalh chak lutuk te, rùi chunga khalh te, helmet leh seat belt hmang loa khalh te, mobile phone hmang paha lirthei khalhte leh traffic dan bawhchhiatnate hi lirtheia chetsualna thlentu langsar zual panga a ni," a ti a; fimkhur taka lirthei khalh ṭhin tur leh mi dangte zirtirtu ni ṭheuh turin kal khawmte a chah.

Serchhip Police chhinchhiah chinah kum 2020 aṭanga January 2025 inkar khan Serchhip district-ah lirtheia chetsualna (accident) vawi 29 a thleng a, mi 30 thiin, mi 33 an hliam. Lirthei chesualte chu two wheeler vawi riat, three wheeler vawi khat, LMV vawi 11 leh HMV vawi kua a ni.

Serchhipa Road Safety Month hawnna inkhawm hi DTO Vanlaldika'n a kaihruai a; additional SP Saidingliana Sailo leh MVI H Lalrohlua te'n traffic rules an sawifiah a, Road Safety Month thutiam sawi rual a ni.