Khaihlak lo tura hma la turin chah

Lunglei district election officer Navneet Mann, bawrhsap hoin nimin khan sorkar department ṭhenkhat leh mi pawimawh dangte'n VC leh LC inthlan awm turah inkalpawhna kawng, kawlphetha, tui leh inbiakpawhna lamah harsatna a awm lohna tura hmalak dan tur an sawiho.

Ṭhukhawmah hian PWD, Power & Electricity department, PHE department, MPRO, NHIDCL, BSNL, Airtel leh Jio aiawhte an tel. Bawrhsap chuan inbiakpawhnaah harsatna a awm loh nan hma la turin BSNL, Airtel leh Jio aiawhte a chah.

Navneet Mann chuan, VC leh LC thlan vuakvêtah inthlan buaipuitute'n an duty-na hmun tluang taka an thlen theih nan kawng enkawltu PWD leh NHIDCL-te chu hma la turin a chah a; a bik takin February 11-14 chhungin kalkawngah khaihlak a awm loh nan kawng laih leh siam chungchangah a ṭul anga ruahmanna siam turin a hriattir.

Power & Electricity department hotute chu polling station tinah kawlphetha a awm theih nan leh inthlan leh vote chhiar hunah kawlphetha a khaihlak loh nana hma la turin Bawrhsap chuan a chah a; polling station tinah tui thianghlim hnianghnar tak pek a nih theih nan hma la turin PHE hotute a chah bawk.