College-a thu sawi tura mi sâwm khapna HTE order tihdanglam a ni dawn

Higher & Technical Education (HTE) minister R Romawia chuan, Mizoram sorkar hnuaia college-ah politician leh páwn lam mi rêng rêng thu sawi tura sawm khapna thupek chhuah tawh chu tidanglamin, 'any outsider' tih chu 'active poltician' tia thlak a nih tur thu a sawi.

Vanglaini palai zawhna chhangin R Romawia chuan, college-a thu sawi tura mi sâwm chungchangah a sawi loh anga order chhuah a nih thu a sawi a, "Active politcian-te thu sawi phal lo turin ka ti a, mahse, any outsider tia order siam a ni. Hei hi ka hriatpui lo a, siamṭhat leh a ngai dawn. Kan duh loh ber chu active politcian-te thu sawi tura sâwm a ni," a ti.

HTE Minister chuan, poli-tician active tawh lo leh mithiamte tawnhriat nei ṭhate chu zirlaite tan pawh a ṭangkai tur thu sawiin, "Politcian active tawh lote chuan political party
ṭan lam an nei tawh dawn lo a, zirlaite tan pawh an tawnhriat a ṭangkai thei a ni," a ti a; active politcian-te sàwm an nih chuan campaign-na atana hman palh a awm theih thu a sawi.

An party ṭhenkhat pawhin college-ah thu sawi ve an duh avangin politcian-te thu sawi phal an duh tih sawiin R Romawia chuan, "Kan zirnain a thil tum ber hlamchhiahin, campaign-na hmuna kan college hi a chang palh a hlauhawm avangin thil tih chi a nih loh thuin ka chhang a ni," a ti.

HTE department-in Mizo-rama college hrang hrangah páwn lam mi thusawi khapna thupek, August 18, 2016-a a tihchhuah chungchangah MZP hruaitute chuan nimin khan HTE minister R Romawia an sawipui a; HTE Minister hi August 22 khan MSU leh Aizawl City College Joint Students Union (ACCJSU) hruaitute'n an kâwm tawh a ni.

MZP chuan, HTE department-in politician leh páwn lam mite college-a thu sawi tura sawm phal lohna thupek a chhuah chu democratic principle kalh nia an hriat thu an sawi a, "Order hi sût turin a changtu Minister hnenah ngenna thlen a ni," an ti a; an thu thlente HTE Minister-in ngun taka ngaihtuah a, siamṭhat ngaite siamṭhat a, a ṭul anga tihdanglam a nih tur thu a lo sawi vangin lawmawm an tih thu an sawi.

MSU leh ACCJSU hruaitute chuan, HTE Minister an hmuhnaah hian, HTE order chhuah chu zirlaite rahbehna leh democracy palzûtna a nih thu sawiin, order sût turin an ngên a; "HTE order-ah hian an khap chhan mumal tak, chhuanlam tling leh ṭan chhan tlak tak a awm lo a, order chhuah nan finfiahna emaw, dân tlawhchhan emaw a awm lo bawk. Eng dan mah tlawhchhan awm loin order chhuah a ni a, hei hi a fel loin kan hria," an ti.