Khawthlang Tuipui lianin kawng leh in a chîm

Tun hnaia ruahsúr nasa vangin Tlabung bula Khawthlang Tuipui a lian mek a, Tlabung leh Borapansury inkalpawhna kawngpui, border road chu Tippereghat khaw thlen hmaah tui lianin a chîm avangin lirthei ke hnih nei chite an kal thei lo a, lawngléng hmanga thiarkai ṭhin a ni.

Tlabung aṭanga thu dawn danin, Khawthlang Tuipui lian hi Tippereghat khuain an tuar nasa ber a, dawr eng emaw zat chu bazar chawpin tuiin a chîm tawh a; chênna in pawh a chîm nual a, leilet leh tuipui kam huan a chîm deuh vek bawk. Thawhṭanni aṭang khan tlémin tui a kám deuh a, mahse, kawngpui a la chîm reng tho a ni.

Tui lianin kawngpui a chím avang hian Tlabung piam lam khaw hrang hrang - Tippereghat, Madhyasora, Dena-sora, Letisury, New Khojoysury, Old Kho-joysury leh a piah lam khuaahte lirthei a lut thei lo a ni.