Hunthar Veng lei tlahniam GSI-in an zir chiang dawn

Hunthar Veng lei tlahniam zir chianga endik turin Geological Survey of India (GSI), Shillong
aṭangin nimin khan senior geologist pahnih - G Rang-mei leh WS Rocky ten Aizawl an rawn thleng.

Sorkar thuchhuah tarlan danin, GSI mi-thiamte hian Hunthar Venga lei tlahniam leh sorkar laipui aṭanga lei tlahniam enkawlna tur Mizoramin a dil mekte an zir chiang dawn a, vawiin hian hna an ṭan beisei niin, September 3, 2016 thleng Aizawlah an chàm beisei a ni.

Hunthar Venga NH-54 kawngpui chhak lama lei tlahniam vang hian nimin khan chhungkaw 11 chu an chenna in aṭangin an insawn chhuak leh a, insawn chhuakte chu khawtlangin hnatlangin bungruate an thiarpui. A hmaa insawn chhuakte nen chhungkaw 41-in an in an chhuahsan tawh a ni.

Aizawl additional DC Lalhmunsanga hnen
aṭanga thu dawn danin, Hunthar Venga harsatna tawkte tan hian Aizawl DC aṭangin Immediate Relief Fund pek chhuah tawh a ni a; chhungkaw 30 tan ni khatah puitling tan Rs. 60 leh naupang tan Rs. 40 zel pek a ni.

Nimina insawn chhuak leh chhungkaw 11 tan chhawmdawlna sum hi dil leh mek a ni bawk.