Dawrpui W-a in ṭhiah dan tur bawhzui

Aizawl District Disaster Management Authority (ADDMA) -in Tuikual kawngpui chhung, Dawrpui West-a Darchhinga in, chhawng 11 ṭhiat tura thu a pek tawh, in neituin Court-a a khinna Gauhati High Court-in ṭum hnih a hnâwl hnuah, Darchhinga in chu ṭhiah a nih theih nan sorkarin a bawhzui.

Aizawl additional DC Lalhmunsanga Hnamte-in Vanglaini palai zawhna chhanga a sawi danin, Gauhati High Court Division Bench-in Darchhinga petition a hnâwl hnuah, ADDMA chuan July 27, 2016 khan Darchhinga in luahtute chu thla khat chhunga an in luah chhuahsan turin a hriattir nghal a ni.

Aizawl Addl. DC chuan, hun tiam pek a ral hnuah Darchhinga in ṭhiah dan tur chu ADDMA-in a la ngaihtuah leh dawn tih a sawi. Zawhna chhangin, mipui tana mimal in him lo ṭhiah tura thupek avangin in neituin zangnadawmna pek theihna danah a awm lo tih a sawi a, "Pu Darchhinga hian a petitiion-ah pawh zangnadawmna a phût tel a, mahse, Court order-ah zangnadawmna pek chungchang sawi a awm lo," a ti.

Tuikual North LC Chair-man leh YMA Secre-tary-te aṭanga complaint an dawn angin, ADDMA Joint Verification Team-in May 24, 2013-ah Darchhinga in hi an enfiah a; Verification Team-ah hian geologist H Lalbiakkima bakah, PWD, Aizawl Municipal Council, Dawrpui LC leh Tuikual North LC aiawhte an tel.

Verification Team hian Darchhinga in chu a chhunga chengte bakah, a bul vela chengte leh a hnuai kawngpuia kalte tan a him lo hlea an ngaih thu ADDMA-ah an thlen a; ADDMA chuan June 3, 2013-ah Report chu an ngaihtuah a, chutah chuan Darchhinga pawh a tel.

Darchhinga'n enfiah nawn leh tura a ngen angin, Geology & Mineral Resources department-a geologist rualte'n June 5, 2013-ah an enfiah leh a, anni pawhin Joint Verification Team report chu an pawmpui a ni.

GMR department mithiamte'n an hmuh dan ADDMA-a an thehluh leh hnuah, ADDMA Chairman chuan Code of Criminal Procedure, 1973 hnuaia Section 133(d)-in thuneihna a pek hmang leh Disaster Management Act, 2005 Section 34(k)-in thuneihna a pek hmangin June 27, 2013-ah thupek a tichhuak a; Darchhinga in luahtute chu thupek chhuah
aṭanga thla khat chhunga in chhuahsan tur leh, in chu thla li chhunga ṭhiat turin a hriattir a ni.

ADDMA thupek hi Darchhinga chuan High Court-ah a khing a, High Court Aizawl Bench-in thu tlingah ngai loin, Februarty 13, 2105-ah a hnâwl. Court thutlukna chu Darchhinga chuan High Court Division Bench-ah a khing let a; chief justice Ajit Singh leh justice Suman Shyam ṭhutnaah ngaihtuah nawn niin, Division Bench pawh chuan mipui nunna dinhmun hlauawma dah turin phalna pek theih a ni lo, tiin Darchhinga petition chu July 2016 tawp lam khan a hnâwl leh a ni.

High Court order chuan, Darchhinga in ṭhiat tura ADDMA-in order a chhuah tawh chu a la nung reng tih a tarlang bawk.