KHAWTHLIR

Thisen pe

Vocational School of Education chuan, nimin khan Aizawl Civil Hospital-ah thisen unit 27 an pe a, a petute hmeichhia 15 leh mipa 12 an ni.

Inter Departmental Sports 2016 tan

Nimin khan Mizorama sorkar hnathawkte infiamna, Inter Departmental Sports (Civil Services Sports Meet) 2016 vawi 29-na chu R Dengthuama Indoor Stadium, Mualpuiah ṭan a ni a, Sports secretary HC Rochungnunga'n a hawng a, August 26 thleng a awh ang.

AH&Vety report

Animal Husbandry & Veterinary department chuan, July 2016 chhung khan ran damdawi-in OPD-ah ran chi hrang hrang 3,749 an enkawl. July thla chhung vek khan sorkarah Rs. 37,740 an chhung lût a ni.

Zirtirtu zir chiang

SCERT chuan nimin khan an auditorium-ah 'Demand and Supply of Teachers’ tih thupui hmangin inràwnkhawmna an buatsaih. State level consultation meeting-ah hian Mizorama sikul tinte'n zirtirtu an mamawh zat te, teacher education institution-te'n an pek chhuah theih zatte leh zirtirtute dinhmun dang chi hrang hrang an zir chiang a ni.

Lîrnghîng

Nimin zing dar 7:11 khan Mizoramah lîr a nghîng a, thil tih-chhiat a neih hriat a ni lo. Lirnghing hi Myanmar ram chhung, Manipur lam hnaiha inṭan a ni a, magniture 5.3-a ná nia thu dawn a ni.

PHE ni loin SIPMIU

August 11, 2016-a Vang-laini editorial-a inziak, 'Sorkar leh sum siamna' tih hnuaia PHE department building ṭhiah chung-changa PHE kalpui anga tarlan chu SIPMIU hnuai zawk a ni tih PHE hotute hnen aṭangin Vanglaini chuan thu a dawng. He building ṭhiah hna hi PHE kalpui ni loin SIPMIU kalpui a ni a, anni hi UD&PA hnuaia agency niin ADB hnuaia project-te kalpuitu an ni a; he building ṭhiah hna hi SIPMIU-in Aizawl Water Supply Scheme hnuaia an hna pakhat a ni.