CSS hâi chhuak turin theihtawp kan chhuah - Rural Development Minister

Rural Development (RD) minister R Lalzirliana chuan, RD department-in central sponsored scheme (CSS) hrang hrang hâi chhuak turin theihtawp a chhuah reng thu a sawi.

R Lalzirliana hian nimin khan MGNREGS convergence sum hmanga Serchhip P&E Venga PHE tui dahkhawlna tur hawnnaah thu sawiin, "State budget aṭang-
in department hian sum dawng tam thei bik lo mah se, CSS hrang hrang hai chhuah lamah theih-tawp kan chhuah reng avangin hmasawnna hna an thawh pawh a tam a, mi harsa zawkte khai-chhuahna leh vantlang mamawh thil hrang hrang ṭhahnem tak siam a ni tawh," a ti.

Tuizém siamna ram hi Roman Catholic enkawl Marian High School-in an pek a ni a, lawmthu sawina atan RD Minis-ter hian Marian High School hnenah Rs. 20,000 a hlan.

RD Minister chuan, tuizem dahna atana Roman Catholic-in an ram an pe chu lawmawm a tih thu sawiin, "Tunlaiah mi tam takin zangnadawmna beiseia an ram ni lo pawh dikhlel taka an ta neih luih duh laia hetianga a thlawna sorkar hnena ram ṭha tak an hlan hi kan lawm em em a ni," a ti.

Tuizem hi RCC hmangin a biala siam a ni a, a lai hawlh-tlang metre 11.24-a zau, meter 6-a sang niin, tui litre 6,00,000 dawng thei a ni. Tuizem chauh hi MGNREGS sum aṭanga sak niin cheng nuai 25.23 sen a ni a, Tuikum aṭanga tui pump chhohna pipe awm hmasa aṭanga tuizema tui a luh theih nan pipe lian milimetre 100 metre 310-a sei an phûm belh a, veng palia chhungkaw 300 vel châwm tura beisei a ni.