Party pahnihin HTE order sût an phût
MNF leh BJP-te chuan thuchhuah siamin, Higher & Technical department-in college-a politician-te thu sawi tura sawm a khapna thupek chu sût turin Mizoram sorkar an phût.
MNF chuan, college-a political science syllabus-ah Mizo hnam movement history telh a ni tih sawiin, hemi chungchangah hian lehkhabu ṭha zirlaite’n an mamawh ang an hmuh loh ṭhin avangin mimal leh ṭhian ho angtein mi hrang hrang an zâwt kual ṭhin a, an zirtirtute mang-angin a huhoin political science class-ah zirtirna pe theitu tur an zawnsak ṭhin niin an sawi.
Political science zirlaite lecture pe tura sawm zingah MNF president Zoramthanga pawh a tìr aṭanga remna siam thlenga sûlsutu pakhat a nih avangin an sáwm ṭhin nia sawiin, MNF chuan, "Lecture a peknaah political party dangte tan ngaimawhawm tur a tel hlauin fimkhur takin thu a sawi ṭhin," an ti a, Mizoram sorkarin politician leh páwn lam mi reng reng college-a thu sawi an khap ta bur mai chu a rang thei ang bera sût turin sorkar an ngen a ni.
India ram leh khawvel ram dangah pawh university leh college tam takah mi thiamna bik neite thu sawi turin sawm an ni ṭhin tih sawiin, MNF chuan, sor-kar chu inngaihtuah nawn tur-in an ngen a; "Ṭhang-tharte thinlungah ram leh hnam a ral hlaua hnam
thinlunga harh thar lehna nasa taka a inṭan chhoh lai hian, a rapbet zawng-a hmalak hi mipui leh
ṭhangtharte duh loh zawng tak a ni ang," an ti.
Mizoram BJP thu-chhuah chuan, sorkarin sorkar college-a politician leh páwn lam mi reng reng thu sawi tura sàwm a khap chu hriatthiam har an tih thu sawiin, "Congress party kaihhruai Mizoram sorkarin khapna thupek a chhuah hi a lung-chhiatthlak a, zirlaite dikna chanvo rahbehna lian takah kan ngai," an ti.
BJP chuan, zirlaite chu ram nu leh pa, ram hruaitu turte an la nih avangin an zirlai piah lamah ram inrêlbawlna leh kaihhruaina kawng-ah an inzir lâwk a ṭul tih sawiin, "Mithiam chi hrang hrang, páwn lam mite aṭanga information ṭha leh rintlak an hmuh hi ṭul leh ṭangkaiah kan ngai," an ti a; páwn lam miin zirlaite tana ṭangkai tur an hrilh theih nana hma la zawk turin sorkar an phût a ni.