BSNL-in ruahmanna tharte an sawifiah

Mizorama BSNL hotute chuan nimin khan Aizawl Press Club-ah thuthar theh-darhtute kâwmin, mipuite tana ham-
ṭhatna tur ruahmanna hrang hrang an siamte an hrilhfiah.

BSNL general manager Venugopal Krishna Mahuli chuan, an customer-te'n telephone leh internet-te man tlâwm zawka hmangin mipuite lawm takin awm se tih chu an duh ber a nih thu a sawi a, "Harsatna kan tawh hrang hrangte chinfel a ni zel ang. Mipuite hnenah service ṭha tak pek kan tum a ni," a ti.

Pathianniah mipuite an âwl deuh avangin telephone an hmang tam duh
ṭhin tih sawiin Venugopal Krishna Mahuli chuan, "Pathianni bikah landline neite tan August 21, 2016 aṭangin darkar 24 chhung unlimited call buatsaih a ni," a ti a; unlimited call hi ni tin zan dar 9 aṭanga zing dar 7 inkarah kalpui a nih thu a sawi.

BSNL hotute sawi danin, BSNL hian landline Plan 49 an siam thar a, a thlawnin an fit sak vek thei. Plan 49 hi thla ruk chhung atan a ni a, thla ruk chhung chu thla tin bill Rs. 49 a ni ang. Thla ruk a zawh hnu chuan plan an duh ang zat an thlan a ngai thung. Broadband unlimited plan pawh 512kbps aṭangin 1 mbps-ah tihsan a ni.

BSNL hotute chuan, BSNL hmang, bill an pek loh vanga tihtawpsakte tan hun ṭha hawn a nih thu an sawi a, "An pawisa bat zat a zirin ngaihhnathiamna a awm a, an number ngaiah tihnunsak leh theih an ni," an ti.