Revenue dept.-in vantlang hmunah Rate hniam zawkin chhiah a la dawn

Land Revenue & Settlement (LRS) chuan vantlang hmuna chhiah an lak chu hun eng emaw chen an tihtawp lailawk hnuin, rate hniam zawk bitukin chhiah an la thar leh dawn.

LRS department-in dan thar, ‘The Mizoram (Land Revenue) Act, 2013 (Act of No 5 of 2013)’ hmanga vangtlang hmun pawi­mawha chhiah a lak turah hian biak-in, community hall, thlanmual, khelmual leh home-te a huam a; chhiah lakna turin department chuan hriattirna an chhuah thar leh tawh a ni.

Revenue department-in dan thar tlawhchhana chhiah a lakna turah dân hlui aia a sanna a tam avangin mipui aṭanga sawiselna a awm a, chuvangin chhiah lakna tur chu nasa taka tihhniam a ni.

Department hotute chuan, chhiah lak tur chu nasa taka an tihhniam avangin mipuiin an sawisel tawh loh an beisei thu an sawi.

Vangtlang hmun pawimawh aṭanga chhiah lak tur hi rate siamṭhat hma chuan Aizawl bika grade-I ah square metre khatah Rs. 6 a ni a, rate tihdanglam hnu­ah chuan Re. 1 a ni thung.

Sorkar department ram aṭanga chhiah lak tur pawh tihniam a ni. Rate siamṭhat hmaa School Education department-in chhiah a chawi tur zat chu Mizoram puma ram 343-ah Rs. 17,47,336.61 a ni a, rate siamṭhat hnuah erawh chuan Rs. 3,48,751.11 niin, a inthlauhna chu Rs. 13,98,585.50 a ni.

Governor complex chu grade II-ah dah a ni a, rate hluiah Rs. 88,699.92 chawi tur a nih laiin, rate thar ang chuan Rs. 17,739.98 an chawi ang.

LRS department hotute sawi danin, vantlang leh department rama chhiah lakna tur atan hian Aizawl district leh Lunglei district-te chu grade I - VI ah ṭhen a ni a, Champhai, Kolasib leh Serchhip district-te chu grade I - IV ah ṭhen niin, Mamit district chu grade I - V ah ṭhen a ni.

Sorkarin khawpui (town)-a a puante chu grade I - IV ah ṭhen a ni a; khawpuia puan loh zawng chu grade I - III ah ṭhen a ni thung.

Dân hlui zawka sumdawnna hmun, ‘commercial place’ tia chhinchhiah chu dan tharah paih niin, grade-a an ṭhen darh chhungah khung a ni. Dan hlui zawka awm lo, dan thara an siam thar zingah agriculture land chu grade I - III ah ṭhen hrang niin, LSC anga chhinchhiah a ni a, chhiah chawi a tlem phah dawn hle niin an sawi.