KHAWTHLIR

A thlawnin en
Serchhip District Hospital (JN Hospital)-a doctor-te chuan nimin khan Doctors' Day pualin OPD-a damlo inentir zinga man chawia thisen, zun leh thil dang enfiah ngaite a thlawnin an ensak a; x-ray leh ha phawite a man la loin an tihsak bawk.

Tui tla hmu
June 29, 2015 tlaia Serlui-B Hydel Project tuikhuaha tla J Lungawia (49) ruang chu nimin zing dar 8 vel khan hmuh a ni. June 24, 2015 a Tuitlawk luia tla Vanlalfaki (20), Saiha ruang pawh nimin chawhnu dar 1:30 vel khan Tuitlawk leh Tuisumpui lui infinna bulah hmuh a ni.

Bru kir awm lo
Mizoram aṭanga Bru tlanchhia, Tripura relief camp-a awmte Mizorama lak lêt tum mekah, nimin khan Hamsapara camp-a mite enfiah tum leh a ni a, mahse Mizorama kir duha inenfiahtir an awm lo. Hamsapara-a enfiah hna hi vawiinah chhunzawma zawh a ni ang.

CM Relief Fund
Kum 1990-a St. Paul’s High School-a pawl 10 zirlaite chuan an pass chhuah kum 25-na lawm nan nimin khan Chief Minister’s Relief Fund-ah Rs. 10,000 an chhung lût.

Serthlum sem
Horticulture department chuan nimin khan Lawngtlai district-ah NLUP hnuaia serthlum thlangtute hnenah serthlum ṭiak 9,080 an sem. NLUP ṭanpuina dawngtute hi khaw 20-a chhungkaw 91 an ni.

Legal Forum
Facebook-a Legal Forum group lehkhabu buatsaih, ‘Legal Forum Volume-II’ chu nimin khan Aizawla IPR Conference Hall-ah Law & Judicial secretary R Thanga’n a tlangzarh.

Lusun khawhar
Rev. K Lalhmingliana (63), Khatla chu nimin chawhma dar 10 khan Synod Hospital-ah kal (kidney) ṭha lo vangin a thi a; vawiin chawhma dar 11-ah an inah thlahna hun hman a ni ang a, chumi hnuah biak-inah vui a ni ang.