Doctor-te’n Doctors’ Day an hmang

Doc­tors’ Day chu nimin khan Indian Medical Association (IMA), Mizoram State Branch huaihawtin district khawpui tinah hman a ni.

Doctor-te’n blood bank tinah thisen an pe a, Aizawlah chuan Berawtlangah seminar an buatsaih bakah, Aizawl Press Club-ah thuthar thehdarhtute an kâwm.

Press conference-ah hian IMA hruaitute chuan, Mizoramin Mizoram State Medical Council a neih tawh thu sawiin, “Mizoramin Medical Council kan neih hma chuan kan zirna state-ah registration kan ti a, Medical Council kan neih ve takah chuan kan state-ah ngei registration kan ti thei tawh,” an ti a; Medical Council chuan damdawi lam mite kaihhruaina a pe a, hriselnaa mipui him zawk nan dan a lekkawh theih thu an sawi.

IMA Mizoram State Branch assistant secretary Dr Chawng­lungmuana chuan, IMA hnuaiah wing pathum - Academic Wing, Programme and Project Wing leh Legal and Ethics Wing-te a awm thu a sawi a; Programme and Project Wing hnuaiah ‘Aao Gao Chalein’ hmangin Nghalchawm khua chu ‘adopted village’ ah an puang a, hriselna kawnga a bik taka an enkawl thu a sawi.

Dr Chawnglungmuana chuan, Legal and Ethics Wing hnuaiah doctor-te’n dik leh zahawm taka mipui rawng an bâwl theih nan ṭan an lak thu leh fimkhur taka thawk tura an infuih reng thu a sawi a, “Mihring ve tho kan ni a, kan thiamnain tawp chin a nei. A mawi lo zawnga doctor che an awmin kan zilhhau a, kan kaihruai a, a ṭul hunah thlavang kan inhauhsak bawk ṭhin,” a ti.

IMA Assistant Secretary chuan, IMA-in thingtlang mite hriselna a ngai pawimawh a, doctor-te indaih lo tak chungin thingtlang mite hriselna tura ṭan an lak thu a sawi a; damdawi (allopathy) chawh chu medical practitioner (MBBS doctor)-te chauhin dan angin an tih theih thu leh, Google chu doctor a ni lo a, rin pui bera neih chi a nih loh thu a sawi bawk.

IMA Mizoram Branch president Dr R Lianzama chuan, doctor-te'n Doctors’ Day-ah mipuite leh doctor-te tan ṭangkai turin thil an tih ṭhin thu sawiin, free clinic, blood donation camp, seminar leh intuaitharna hunte an buatsaih ṭhin thu a sawi.

Doctors’ Day puala blood bank tina thisen an pekah Aizawl Civil Hospital-ah chuan mipa 17 leh hmeichhia pasarihin unit 24 an pe a, Synod Hospital-ah unit li an pe. Lunglei Civil Hospital-ah unit sarih an pe a, Serkawnah unit thum, Serchhipah unit li, Kolasib-ah unit li, Lawngtlaiah unit hnih leh Mamit-ah unit khat an pe. District tina pek zat belhkhawm chu unit 49 a ni.

Doctors’ Day hi India rama doctor thiam leh lâr, Bharat Ratna hial dawngtu leh West Bengal chief minister hlui Dr BC Roy pian cham leh thih cham, July 1-ah India ram pumah hman ṭhin a ni.