Rate thar angin parking fee lâk tan a ni

Aizawl Municipal Council chuan nimin aṭang khan Aizawl khawpuiah rate thar angin kawngpui sira lirthei hûn man a la ṭan.Khawpui lùn laia motor parking ṭhenkhat pawh tihtawp a ni.

AMC-in thutlukna a lo siam tawh angin, Aizawl khawpuia lirthei hûnna hmunte leh lirthei hûn man thar chu nimin khan hman ṭan a ni. Zirlaite chu an zirna-in aṭanga ft. 300 huam chhungah chuan student ID hmangin parking fee a zatve (50%)-a tlem chawitir an ni.

Parking fee rate thar hi rate hlui aiin darkar huam chhungah chuan a lêtin a pung. Darkar khat chinah two wheeler tan Rs. 10 leh LMV tan Rs. 20 chawi a ngai dawn. Hmun lûn lai bik (hot zone)-ah chuan darkar khat hnu lamah hmun dang aiin lirthei dah man a pung chak dawn a ni.

Aizawla motor parking hman mek, nimin aṭanga tihtawp takte chu - Millennium Centre hma lam leh chung lama two wheeler parking te, Chanmari-a TATA workshop hnuai zâwn thla te, New Market thlang Chhinga Veng kawngpuia lirthei dahna te, Assam Rifles mandir bula two wheeler parking te, Canteen Kual leh Thanchhingi & Sons mobile phone dawr inkara two wheeler parking-te a ni.

AMC executive councillor (Parking) Rosiamngheta chuan Vanglaini zawhna chhangin, parking fee rate thar anga lak ṭan leh hmun lûn laia lirthei hûnna tihtawp avangin harsatna siam zawnga khawsa an awm a hriat loh thu a sawi a; "Parking tihtawp takte hi dropping zone-ah hman a ni ang," a ti.