Pangbalkawn khawtlangin sikul khâr

Pangbalkawn All NGO Committee leh zirlai nu leh pate chuan, Pang­balkawn Primary School building thuam ṭhat phûtin nimin aṭang khan tiamchin awm loin sikul an khâr. Pangbalkâwn P/S-ah hian zirlai 132 an awm mek a ni.

Pangbalkawn khawtlang hruaitute sawi dan­in, Pangbalkawn P/S hi a chhe tawh hle a, ruah a sûr chuan zirlaite an tlan hawtir mai ṭhin. Class room pindanna (partition) a awm lo a, naupang 3-4 ṭhut theihna turah 6-7 velte an ṭhuttir ṭhin a ni. Kawngkhar ṭhenkhat a awm tawh lo a, a awm chhun pawh kalh theih a ni lo.

Sikul thawm ṭha tur hian sorkar hnenah ngenna an thlen tawh ṭhin a, School Education department hotute pawhin Kolasib district-a sikul chhe ber a nih thute an lo hrilh ṭhin. Sum awm sa vek anga sawi siin, tun thlengin hmalakna tak tak an la nei lo a ni.

Khaw­tlang hruaitute chuan, “Sor­kar tihmualpho tum vanga sikul khâr kan ni lo a, chhiatrupna thleng thei laka kan fate an him theihna tura khâr kan ni,” a ti a; school office RCC building, kum 2013-a sak pawh a hnu lawkah thliin a len chhiat nghal thu an sawi.