Buhfai supply-tu thlan dan sawifiah turin Court-in sorkar leh Mizofed a hriattir

Mizoram sorkarin buhfai supply tura MIZOFED a thlan dan chu mi ṭhenkhatin Gauhati High Court-ah an khing a, High Court chuan Mizoram sorkar leh MIZOFED-te chu August 31, 2016 ral hmaa Court-a insawifiah turin a hriattir. Hetih lai hian, MIZOFED chuan sorkarah buhfai quintal 30,000 a supply tawh.

Thu dawn danin, Mizoram sorkarin open market-a buhfai supply tur thlanna atan April 9, 2016-ah tender thar a chhuah. Tender chhángtute leh a chhángtute zinga mi thlang loin, MIZOFED hnenah supply order a pek avangin, tender chhangtu zinga lungawi lo mi 10 vel intêl khawm chuan sorkar thil tih dan chu High Court, Mizoram Bench-ah an khing a ni.

PIL thehlut tura intêlkhawmte'n Vanglaini an hrilh danin, High Court-a petition thehluha hming tumtute chu - Philip Lalawmpuia, Tuikual; Laldawngliana, Keifang leh Lalrinchhuanga, Bilkhawthlir te an ni a, August 18, 2016 khan Court-ah petition an thehlut a ni.

An PIL thehluh chu High Court chuan thu tlingah pawmin, a ngaihtuah tawh a, Mizoram sorkara Food, Civil Supplies & Consumer Affairs department leh MIZOFED-te chu August 31, 2016 ral hmaa insawifiah turin a hriattir a ni. Chutih laiin, High Court chuan MIZOFED-in buhfai a supply mek chu a titawp lailâwk (stay) rih lo thung.

FCSCA department-a buhfai supply tur hian mi 29-in tender an chhâng a, chu'ng zinga mi 20 chuan tuna MIZOFED-in a supply-na rate, quintal khatah Rs. 2,500 aia tam loin an chháng a, Rs. 2,450-a supply tura chhángte pawh an awm.

Mizoram sorkar erawh chuan, tender chhangtute chu thlang loin, tender chháng ve lo MIZOFED chu buhfai quintal khat Rs. 2,500-a supply turin order a pe a ni.

Sorkar khingtute aṭanga thu dawn danin, Rs. 2,500 leh a aia tlema tender chháng mi 20 zingah hnam dang, Mizo hming hawha chhangte pawh an awm a, chungte chu High Court-a zualkote zingah an tel lo. Rs. 2,500 aia tam loa chhang zingah MIZOFED nena inkawp sa an awm thu leh, chumi avang chuan an intêlhawmnaah pawh an tel duh loh thu an sawi bawk.

Supply department-in MIZOFED hnena buhfai supply order a pekah chuan, September 2016 ral hmaa buhfai qtl. 1,03,000 Mizoram sorkara pe tur leh, September thla hnuah chuan thla tin qtl. 65,000 pe tura tih a ni.

MIZOFED hian tun dinhmunah buhfai qtl. 30,000 a pe tawh a, qtl. 40,000 dang pek tumin a buaipui leh mek niin FCSCA department hotute chuan an sawi.

MIZOFED chairman Laldawngliana pawhin, FCSCA-in supply order a pek hnuah sorkara buhfai pe turin an buaipui nghal a, qtl. 30,000 chuang an pe tawh tih Vanglaini a hrilh.