Revenue deptt-in aikal lâk an khap Aikal late mahni inbànah an ngai dawn

Land Revenue & Settlement (LRS) department chuan, an department-a aikal la ṭhinte chu anmahni ngeiin an hna an zawm loh chuan anmahni thua inbàn anga ngaih an nih tur thu an hriattir.

Hetih lai hian, LRS department hotute chuan, ram teh a nih a, buaina a awm zui lohna atan mipuite fimkhur se an duh thu an sawi.

Vanglaini palai zawhna chhanga LRS department hotute sawi danin, an department hnuaia aikal late chu September 1, 2016 aṭanga anmahni ngeiin an hna zawm tawh tura hriattir an ni a, hna an zawm loh chuan anmahni thua inbân an nih tur thu hrilh nghal. Hei hi department chhunga inrêlbàwlna a felfai zawkna atana tih a ni.

LRS dept. hotute chuan, an department hnuaia hna thawk zingah aikal la a, lehkha zir zawm, dawr nghâk leh thil dang ti daih an awm thu sawiin, "Insiam ṭhat tumin theihtawp kan chhuah a, aikal laa thil dang ti daih an awm hian inrêlbawlnaah harsatna leh inthîkna a awm thei a ni," a ti a; harsatna tak tak neite chu hriatthiamna chin thuneitu sang zawkte pawhin an neia an hriat thu an sawi.

Attendance record-a hming ziak si, mamawh an nih huna awm leh si lote pawh an awm
ṭhin thu sawiin LRS department hotute chuan, "Hemi kawngah pawh hian theihtawp chhuaha
ṭan kan tum a ni," an ti.

An department-a thawktu zingah ram teh tura tih ni si lo, mahni thua mi ram lo teh ngawt chíng an awm thu sawiin LRS department hotute chuan, "Heng mite hian department dan tia sawiin ram neitute pawisa an dil ṭhin. Tun hnaiah pawh surveyor leh peon pakhat chu man chhuah an ni. Surveyor hi dan anga hrem a ni a, peon hi a hma aṭanga sawisel kai tawh a nih avangin bàn a ni," a ti.

Ram teh tura tih an nih loh chuan LRS department-a thawk an nih avangin ram teh ngawt theih a nih loh thu an sawi.

LRS department hotute chuan, ram chungchangah har-satna a awm lohna atan theih-tawp an chhuah tih sawiin, "Ram buai a tam em em a, chinfel an tumin ṭan kan la. Surveyor-te'n ram an teh dawn reng rengin, a bula ram neitute leh village council/local council aiawhte awm ve turin kan ti tawh a, no objection certifcate (NOC) ziaktute chu an thlalak leh an contact number thehlut zel turin surveyor-te hriattir an ni tawh. Hei hi a hnua harsatna awm thei venna atana tih a ni," an ti.

Ram teh a nih dawnin, a bula ram neitu leh VC/LC aiawh an awm loh chuan surveyor-te'n an duh chen chen an teh emaw, mipuiin an duh chen chen an tehtir a awm ṭhin thu LRS hotute chuan an sawi a; NOC ziaktu tur a bula ram neitu leh VC/LC-te an awm ngei tih finfiahna leh an contact number surveyor-te'n file-a an thil tel zel chuan harsatna tam tak a sutkian tur thu Vanglaini an hrilh.