Health dept. hnenah ambulance hlan

Reduction of Infant Mortality Rate (IMR) incentive aṭanga lei, ambulance pahnih chu nimin khan Health minister Lal Thanzara'n a pisaah Hospital & Medical Education director Dr K Lalbiakzuala hnenah a hlân.

Health Minister chuan, ambulance chu damlo enkawlnaah a loa awm theih loh a nih avangin lei hmasak ang angte damlote'n ṭangkai taka an hman nghal theih nan a rang lama inhlân a nih thu a sawi a, "Ambulance lei hmasak pahnihte hi light vehicle a nih angin, khawpui chhung leh hmun dangah pawh an tlang zung zung thei dawn a, damlote tan ṭangkai taka hman a nih ngei a beiseiawm," a ti.

Sorkar thuchhuah tarlan danin, Health department chuan IMR tihniam tura hna a ṭhawh that avangin 13th Finance Commission aṭangin lawmman (incentive grant) an dawng a, High Level Monitoring Committee
ṭhukhawm chuan an sum dawn aṭangin ambulance lei nan cheng nuai 55 a pawmsak a ni.

Cheng nuai 55 aṭang hian medium vehicle ambulance pahnih dang lei tura hma lak mek a ni a, pakhat chu ICU on Wheels-a hman tur a ni. ICU on Wheels hi khawl ṭha leh changkang tak tak, damlo nunna chhan nana mamawh - transport ventilator, multi monitor, infusion pump, laryngoscope leh hmanraw dangtea thuam tur a ni.