Central YMA-in IOC hotute an kâwm

Central YMA hotute chuan, nimin khan Guwahati-ah Indian Oil Corporation Ltd. (IOC) hotute an kâwm a; Mizoramah dik lo taka gas tihchingpen a nih ṭhin dan leh dan (rules) an neihte lekkawh chungchang an sawipui.

CYMA hotute hi IOC general mana­ger a awm loh avangin a aiawhin senior manager (LPG Operation) Pankaj Bhattacharya chuan a lo dawngsawng. YMA hruaitute chuan Mizorama gas tihchingpen a nih dante sawipuiin, carrying contractor atan tualchhung mite duhsak ve ṭhin turin an ngen.

CYMA hotute hian chief retail sales manager Dibyajyoti Datta pawh an kâwm a; petrol pawlh dal leh litre tling lo ṭhin chungchang an sawipui a, "Mizoram hi India ram kan ni ve chungin ngaihsak kan hlawh tâwk lo ṭhin," an ti.

Petrol latute'n a ṭhat tawk loh leh a tling ngei em tih finfiah theih dan mipui inzirtirna, public demonstration Mizoramah a tam thei anga nei thuai tur rawtna CYMA hotute an thlen chu Dibyajyoti Datta chuan tihhlawhtlin thuai a intiam a ni.

Central YMA hruaitute chuan, IOC-in Mizoram a ngaihsak tâwk lo nia sawiin, "Sorkar lahin nawr a tum bawk si lo a, chuvangin, YMA bultumin hemi lam harsatna hi sutkiang tumin theihtawpin hmalak mek a ni. Awmzia a nei vak lo a nih chuan a ṭul angin na lehzuala hmalak zui tum a ni ang," an ti.