KHAWTHLIR

Thisen pe

Kolasib Town PYD (UPC NEI)-te chuan August 23 khan Kolasib District Hospital-ah thisen unit 38 an pe a; thisen pek laia a petute'n an hmeh ṭhin ball ném chi pathum an pe nghal.

Mi 1,208 admit

July 2016 chhung khan Aizawl Civil Hospital-ah mi 35,920 an inentir a, mi 1,208 admit an ni. Nau piang 331 awmin, damlo thi mi 65 an awm a, Mizoram páwna inenkawl tura thawn mi 155 an awm bawk.

Champhaiah dan zâwm lo endik

Champhai Anti Tobacco Squad leh Traffic Police-te chuan nimin khan joint operation neiin, Kanan Veng Bazar leh Kahrawt Field bulah an duty a, lirthei chhunga meizial zu an awm leh awm loh leh dan phal loh ram dang meizial phur an awm leh awm loh an endik. Dan bawhchhia mi panga an man a, mi eng emaw zat chu motor chhunga meizial zu lo turin an hriattir.

Harsatna sutkian dan tur sawiho

Supply department, Food Corporation of India (FCI) leh Traffic police hotute chuan, nimin khan Supply Director pisaah FCI kudam, Ramrikawn aṭanga buhfai phurh chhuah tum leh phurh luh tum kal velin kawngpui dungah lirthei dang tan harsatna a siam ṭhin tihziaawm dan tur an sawiho. Meeting zawhah a hmunah kalin, a tihfel dan tur enho nghal a ni.

Lir a nghîng

Nimin tlai dar 4 pelh hret khan lir a nghing a, Mizoramah na lutuk loa hriat ni ve mah se, thil tihchhiat a neih hriat a ni lo. US Geological Survey tarlan danin, lirnghing hi Myanmar ram lailia Meiktila-a inṭan niin, magnitude 6.8-a ná a ni a, India ramah pawh Mizoram bakah, West Bengal, Jharkhand, Bihar, Assam leh Manipur hmun ṭhenkhatah hriat a ni.

Assembly Session

August 30, 2016 aṭanga Mizoram Assembly session neih dan tur duan fel a ni tawh a, ni hnih awh tura ruahman a ni. Ni hnih chhung hian sorkar thil pawimawh hrang hrangte ngaihtuah a ni ang.