Hrisel loh chuan hma a sawn theih loh - R Lalzirliana

Helen Lowry Higher Secondary School NSS Unit & Medical Laboratory Technical department chuan, nimin khan Thingsul Tlangnuamah free medical camp an buatsaih a; Home minister R Lalzirliana'n hawngin hrisel loh chuan hmasawnna a awm theih loh thu a sawi.

Home Minister chuan, ram tihhmasawnna atan ruahmanna ṭha tak tak duang mah se, a chhunga cheng mihringte kan hrisel loh chuan a thlawn mai a nih thu a sawi a, "India rama cancer vei tamna ber state kan ni hi thil zahthlak tak a ni," a ti.

Kan nunphung siamṭhat a, ei leh in, zuk leh hmuam kan hman danahte kan fimkhur a tul tak meuh tih sawiin R Lalzirliana chuan, "Ram dang aṭanga ei theih kan lakluh, quality control lam enfiahna paltlang lote kan eiin kan in thin hian kan fimkhur lohzia a tilang a ni," a ti.

Mizoramah HIV/AIDS a pun zel thu sawiin R Lalzirliana chuan, "HIV/AIDS hi ram dangah pawh a awm ve tho a, amaherawhchu invenna lamah an ṭhangharh hle. Mizoramah pawh hri ṭha lo inkaichhawn theih lakah a vei mekte thinhrikna tel loin, a la vei ve lote kan inven thiam a pawimawh," a ti a; mipat hmeichhiatna kawngah insûm theih a ngaih thu a sawi.

Medical camp hawn inkhawm hi Helen Lowry HSS principal Thangzovi Fanai-in a kaihruai a, Thingsul Tlangnuam V/C leh YMA aiawhte pawhin thu an sawi a ni.

Medical Camp-ah hian Adventist Hospital doctor panga (Paediatrician 1, Dental Surgeon 2, Gynaecologist 1 leh General 1) leh nurse ten nilengin damlo an en a; Helen Lowry NSS Unit-te'n an pui a, damlote chu a thlawnin damdawi pek an ni.