Ruihhlo ngaite zinga hnathawh thlirho

Mizoram State AIDS Control Society (MSACS) chuan ruihhloa inchiu ṭhin, people who inject drug (PWID) zinga FHI360 (Family Health International) nena an thawhhonaa an hnathawhte August 23 khan National AIDS Control Organisation (NACO) hotute nen MSACS conference hall-ah an thlirho.

Meeting kaihruaitu Dr Lalmalsawmi Sailo, MSACS project director chuan, MSACS anga an hmalak mekna tichak tura Project Sunrise an neih belh chu lawmawm a tih thu sawiin, "Kohhran liante nen pawh thawkho tura ke kan pên ṭan avangin kan hma lamah beiseina sang tak kan nei," a ti a; Mizoram dinhmun a ṭha lo tih hre chiangtu thawktute chu ṭan la leh turin a ngen.

NACO programme specialist Aditya Singh chuan, Health sub-centre-ah ruihhloa inchiu
ṭhinte'n inchiuna hriau thianghlim an thleng theihna tur SDNS (Secondary Distribution of Needle & Syringes)-ah sorkar laipuiin hmalakna a tihhlawhtlinna hmasa ber chu Mizoram a nih thu a sawi.