Dawhthei taka test result nghak turin Health minister-in mipuite a ngen

HFW Minister hian September 19, Inrinni khan thuchah sawiin, district 10-a TrueNAT laboratory dinah natna chi hrang 16 endik theih a nih avangin thingtlang leh hmun hla zawka damlo, Aizawl pan ngai ṭhinte'n an district khawpuiah inendik thei tawh dawn thu a sawi a, "Covid-19 hri léngin min kiansan hnuah pawh ṭangkai takin kan chhawr chhunzawm zel ka ring," a ti.

Aizawl bikah swab sample endik tur a tam em avangin ZMC labotatory-a thawkte an rim hle tih sawiin R Lalthangliana chuan, "Tunlai tak phei chuan hahchâwl hman lêk loin, chhun zan zawmin, tlaivar tak meuhin hna an thawk a, an inpekna a chhuanawmin an fakawm hle a ni," a ti a; hripui veite hnu chhuitu (contact tracing team) leh swab sample latu (collecting team)-te pawh an hah tak zet tih sawiin, frontline worker-te tan ṭawngṭai ṭhin turin mipui a ngen.

Swab test turte chu a sang bîin ZMC-ah a innghâk khawm tawh tih sawiin Minister chuan, "Emergency-a test ngei ngei ngai an awm ṭhin a, anni tih loh chu sample lâk ni indawtin test ṭhin a ni. ZMC laboratory-a thawkte'n theihtawp tak meuh an chhuah tih min hriatsak ula, dawhthei taka min lo nghak hram hram turin ka ngen che u a ni," a ti.

Dr R Lalthangliana chuan, Mizoram sorkarin August thla aṭangin private hospital leh laboratory-ahte TrueNAT kháwl hmanga swab test leh rapid antigen test (RAT) tih a nih theih nan hma a la tawh tih sawiin, tunah chuan private hospital leh laboratory-ahte TrueNAT leh Rapid Antigen Test (RAT) hmangin swab sample endik theih a nih tawh dawn thu a puang.

Health Minister sawi danin, private hospital/laboratory-a swab test ti turin The Mizoram (Containment and Prevention of Covid-19) Ordinance, 2020 siamṭhat a ngaih avangin dan anga thil tih ngai a awm a; Ordinance siamṭhatna chu Law & Judicial-in an vet hnuah CM-in Council of Minister pawmpui kher loha tihfel turin a ti a, September 18, 2020 tlai khan sorkar gazette-ah tihchhuah a ni.

HFW minister Dr R Lalthangliana chuan, Covid-19 chu khawvelin a hriatthiam dan a inthlak fo a, mithiamte'n an zir chianna aṭangin an ngaihdan leh pawm dan a danglam ṭhin tih a sawi a, "Kan hriatthiam dan ang leh mipui tana him thei tur ang ber ngaihtuah chungin inkaihhruaina leh kalphung her rem zel a ngai," a ti.

Mizorama Covid-19 veite chungchang - hri an kaina leh kai dan te, positive-te enkawl mekte awm dante chu mithiamte'n an zir chiang tih sawiin R Lalthangliana chuan, "Covid-19 veite enkawlna hmun aṭanga inchhuahtir dan tur 'Discharge protocol' siamṭhat a ni a, rei lo têah hman ṭan theih beisei a ni," a ti a; contact tracing aṭanga swab sample endik ngaite thliar leh inkhung dan turah pawh zir chian mek a nih thu a sawi.

Dr R Lalthangliana chuan, Mizoramah hripui vei hmuh chhuah an pun zel avangin ruahmanna thar sorkarin a ṭul angin a siam tih sawiin, "A bika enkawl ngai lo, an taksaa symptom lang chhuak lo, doctor-te'n asymptomatic tih an hriatpuite chu an dinhmun azirin an in lama inenkawl phalsak a ni tawh a, amaherawhchu, an chenna VTF/LTF-te'n an remtih hnuah HFW department-in an hmunhmate uluk takin an endik ang a, an pawm chuan ina inenkawl phalsak an ni ang," a ti.

Aizawlah Thawhṭanni aṭangin inkhàrkhipna hlih a ni dawn a, kalphung pangngaia kal leh tawh tur a nih thu dawiin Minister chuan, "Ei leh bâr, ni tina kan eizawnna kawngah mi tinin mawhphurhna kan nei lian em em. Ṭul tàwpkhâwkah lo chuan páwnah chhuak lo ila, ṭhenawm khawvénga lên pawh a ṭul tàwpah lo chuan i insúm rih ang u," a ti a; sorkar thuchhuakte zâwm turin mi tin a ngen.

Dr R Lalthangliana chuan, tun hnaiah sorkar department / contact tracing team hminga uangthuanga phone hmanga mi dang bia, swab sample lâk a ṭul thu leh inkhung hrang rih tura hrilh ṭhin an awm tih sawiin, "Hei hian contact tracing team-te hnathawhah harsatna a thlen avangin kan la thutak hle a, hetiang thil hi ti tawh lo turin kan han inhriattir a ni," a ti.

Health Miniser hian Covid-19 dona leh a kaihhnawih chi hrang hranga thawktute zawng zawng chungah lawmthu a sawi a; thâ thlah loa ṭang zel tur leh ṭawngṭai zel turin mi tin a sáwm a ni.

•    RT-PCR khawl mi ta hawhin April 7, 2020 aṭangin ZMC-ah swab test ṭan a ni a, July thla aṭangin sorkarin RT-PCR khawl pathum a neih hmangin ZMC-ah swab test kalpui ṭan a ni. RT-PCR leh swab test atana senso zawng zawng chu Rs. 1,81,72,108 a ni tawh.

•    Sorkar laipuia TB Division aṭanga TrueNAT khawl dawn hmangin June 12 aṭangin Lunglei CC-ah Covid-19 swab test ṭan a ni.

•    Chief Minister’s Relief Fund (CMRF) aṭangin TrueNAT Quattro micro PCR khawl 10 lei a ni a, district 10-ah bun felin, hman ṭan a ni tawh. District 10-a TrueNAT laboratory din nan leh a kaihhnawih mamawh atan CMRF aṭangin Rs. 3,82,34,830 hman a ni tawh.

•    August 6-ah RAT ṭan a ni a, test kit chu ICMR aṭangin a thlâwnin 17,500 dawn a nih bakah, National Health Mission aṭangin CMRF leh state sorkar sum Rs. 1,83,68,000 hmangin test kit 40,000 lei a ni tawh. Test kit hi lei belh leh tawhin, 20,000 chu Delhi Mizoram House-ah a awm tawh a, vawiinah Mizoram a thlen an beisei. Test kit 30,000 dang lei turin an book tawh bawk.

•    Mizorama Covid-19 recovery rate chu 62.85% vel a ni a, India ram puma recovery rate 79.28% aiin a hniam; a chhan pakhat chu - uluk leh fimkhur taka an enkawl vang leh state dangte aia an chhuahtir har vang a ni.