LC inthlan kaihhnawih kal zelah Covid-19 vei 4 hmuh belh a ni

September 18, Zirtawpni Zoram Medical College (ZMC) laboratory-a swab sample endik aṭanga Covid-19 vei hmuh chhuah zingah Mizo, Mizoram chhunga kái chhâwng (local positive contact) paruk an tel a; an zinga pali chu tun hnaia local council inthlan kaihhnawiha hripui kai chhui zuina kal zela swab sample endik an ni.

Covid-19 vei Zirtawpnia hmuh chhuah zinga local positive contact parukte chu - Tuithiang venga hmeichhia pali, kum 15-41 inkarte leh, Kulikawna mipa pahnih, kum 24 leh 32 mite an ni a; an vai hian harsatna an nei lo (Covid-19 symptom a lang lo).

Tuithiang Local Task Force hruaitute chuan Vanglaini palai zawhna chhángin, an venga hripui vei hmuh chhuah thar palite chu an veng mi, September 10-a Covid-19 positive tih hmuh chhuahte'n an tlawh chhungkuaa mite vek an nih thu leh, chumi avanga swab sample test an nih thu an sawi.

Tuithiang LTF hruaitute chuan, an veng hmeichhia pali, hripui veite swab sample endik chhan ber chu an veng mi pathum, a hmaa Covid-19 vei tih hmuh chhuah tawhte'n an tlawh vang a nih thu an sawi rualin, "Hei hi an kai chhana rin ber a ni a, mahse, hmun dang aṭanga kaite pawh an ni ve thei tho," an ti. September 10-a hripui vei hmuh chhuah Tuithianga kohhran upa pathumte chu August 27, 2020-a local council inthlanah official niin, vote chhiarnaah an tel vek a ni.

September 18-a hripui vei hmuh chhuah, local positive contact zinga Kulikawn veng mi mipa pahnih zinga pakhat zawk chu Covid-19 a kai chhan leh a kai ṭanna àwm hriat a la nih loh thu, sorkar thuchhuah chuan a tarlang.