A duh tan sikul kal theih a ni dawn

Mizoram sorkar chuan September 21, vawiin aṭangin high school leh higher secondary school zirlaite chu sikul kal a phalsak a, kal ngei ngei tur erawh a ni lo. Zirtirtute pawh a zatve aia tam lo sikulah awm ṭhin turin a hriattir bawk.

State sorkarin August 30, 2020-a Unlock kaihhruaina siam tawh leh Ministry of Home Affairs (MHA)-in August 29-a Unlock-4 kaihhruaina a tihchhuah zûlzuiin Mizoram sorkar chuan September 21 hnu lama sikul, college leh zirna-in dangte kal dan tur a duang a, chu chu September 19, Inrinni khan Disaster Management & Rehabilitation department hmingin tihchhuah a ni.

Thupek leh kaihhruaina ken­kawh dan tur chu a kaihhnawih department-te bawhzui tura tih a ni a; sikul leh training neihna hmunah Ministry of Health & Family Welfare-in Covid-19 laka invenna atana SOP a tihchhuahte ṭha taka zawm tur niin, a kenkawh chungchangah zirna-in thuneitute'n mawh an phura ang.

•    Containment area páwnah chuan pawl 9-12 inkar zirlaite chu anmahni duhtthlannain an zirtirtute ráwn turin sikul an kal thei ang. Hemi tur hian an nu leh pa / guardian-te phalna ziakin sikulin an la tur a ni a, MoHFW-in SOP a siam chu khauh taka zawm tur a ni.

•    Sikulah hian teaching leh non-teaching staff-te chu online teaching/counseling pe turin 50% aia tam lo kal phal a ni ang. Sikul kal zawng zawngte hian MoHFW-in SOP a siam chu khauh takin an zâwm tur a ni.

•    Industrial Training Institute (ITI), National Skill Development Corporation emaw, sorkar laipui hnuaia ministry dang emaw, state sorkar hnuaia short term training centre anga in register-te chu skill/entrepreneurship training neih phalsak a ni ang.