Sik leh sa inthlak chungchang damdawi lama thawkte zirtir

National Programme on Climate Change and Human Health (NPCCHH) chuan nimin khan Directorate of Hospital & Medical Education (DHME) conference hall-ah Aizawl East leh Aizawl West district-a AYUSH medical officer-te leh health & wellness centre-a health & wellness officer-te tan Training of Trainers an buatsaih a; National Health Mission director Dr Eric Zomawia'n a hmanpui.

Training-ah hian sik leh sa leh boruak inthlakin hriselna a nghawng dan te, mipui tana invenna tur leh boruak/leilung tichhe lo tura tih tur hrang hrangte inzirtirna a ni a; training-a telte hian an awmna huam chhunga accredited social health activist (ASHA) leh Jan Arogya Samiti (JAS) member-te an zirtir chhawng ve leh dawn a ni.

Zirhonaah hian NPCCHH state nodal officer Dr Vanlalrengpuia Chinzah-in training thupui a sawi a; NHM state programme manager Dr B Lalthantluanga, NPCCHH district nodal officer Dr Walter Lalnuntluanga Sailo leh state consultant Rosie Zosangkimi ten thupui kaihhnawih thil pawimawhte an zirtir bawk.

Dr Eric Zomawia chuan, NHM chu mi zawng zawng ban phak, mi tin chhawr theih tura man tlawm zawka hriselna lama inenkawlna ṭha nei tura hma latu a nih thu a sawi. Mizorama sorkar damdawi-in zinga 19 chu India ram damdawi-in ṭha thlan zingah a tel tawh thu sawiin, training-a telte chu ram leh mipui tan theihtawp chhuah zel turin a fuih.