Swab sample latute an thawkrim

Covid-19 vanga Aizawl véng hrang hranga swap sample latu, hlawh nei loa sorkara inpete an thawkrim hle a, zing dar 1-3 vela ina haw chángte an nei fo. 

Integrated Desease Surveylance Programme (IDSP) state nodal officer Dr Pachuau Lalmalsawma chuan, "An inpekna, huaisenna leh taimakna hi kan fak tak zet a, khawvel hmun dangah pawh hetiang hi an tam bik lo ang," a ti.

Vanglaini palai zawhna chhangin Dr Pachuau Lalmal­sawma chuan, IDSP hnuaia hlawh nei loa swab sample la tura inpete'n a tìr aṭanga tun thlengin rim takin an thawk tih a sawi a, IDSP bika thawk tura inpe bikte'n sample 6,000 chuang an lak tawh thu a sawi.

Hlawh beisei loa thawk tura inpete chu a tîr lamah buai ve deuh mah se, State Filed Laboratory Unit din a nih hnuah felfai zawka an kal nghal thu sawiin Dr Lalmalsawma chuan, "Pathianniah pawh châwl loin an thawk a, phûr takin an lo kal reng thei a ni," a ti a; ZMC laboratory-a thawkte'n pawisa an thawh khawm Rs. 20,000 an pek tawh thu leh, swab sample la tura an kalnaah veng ṭhenkhatin an lo chawimawi ṭhinte leh an puala thilpek an lo pe ṭhinte chu lawmawm a tih thu a sawi.

Swab sample la tura inpete pawhin zawhna chhángin, a tìr lamah chuan an indaih loh avanga an buai thu te, tunah erawh chuan inpe an awm nual tawh avangin awmze nei leh felfai zawka an kalpui tawh thute an sawi.

Volunteer-te zinga mi Lalruatsanga, laboratory technician chuan June 14, 2020-ah a inpek thu leh sample lak tur a tam avangin an haw tlai cháng a tam thu a sawi a, "Ina ka haw tlai ber chu zing dar 1 a ni. Veng pali/pangaahte kal a ngai a, ICMR portal-a mi turte ziah fel vek a ngai a, sample lâk tak chu rei lo mah se, a kaihhnawih a tam avangin haw tlai chang kan ngah," a ti.

Lalruatsanga chuan, hlawh nei loa thâwk an nih avangin mi ṭhenkhatin pawisa pek an tum fo tawh tih sawiin, "I account number min pe la, pawisa kan rawn thun ang, tite an awm zauh zauh. Mahse, ka duh lêm lo. Tun hnaiah erawh pawisa min pài zauhte an awm a, lâk loh theih lohte a ni ṭhin," a ti a; a chhungte'n hlawh nei loa a inpek chu an phûrpui tlat thu te, sample an lakna vengah LTF-te'n ei leh inahte an lo duat ṭhin thute a sawi.

July 1 aṭanga thawk ṭan Gospel Hmingduhawmi pawhin, an zirna line-a ram tana an pên ve thei chu lawmawm a tih thu leh a chhungte'n an thlàwp ṭhat thu a sawi a, "Swab sample lâk tur a tam zual lai chuan kan thawkrim ve hle a, zan rei taka haw chángte kan nei. Ka haw tlai ber chu zing dar 3-ah a ni a, zing dar 1-a in thlente pawh ka nei a, zan dar 10 vela haw chángte pawh kan nei," a ti.

Gospel Hming­duhawmi sawi danin, chawhma dar 10-ah office an thleng a, ni khatah hmun 5-7 velah an kal ṭhin. Veng ṭhenkhatah chuan sample lak tur a tam avangin zan dar 9-10 vel thlenga lak changte an nei a, sample lak zawhah ziah fel ngaite an ziak fel a, chumi zawhah ZMC-ah an dah ṭhin a ni.