Siaha-in khawpui fai lawmman an lawm

Mizoram Cleanliness Competition 2024-a district khawpui fai intihsiaknaa pahnihna Siaha chuan nimin khan MADC Golden Jubilee Hall-ah an lawmman dawn an lawm a, Mara Autonomous District Council (MADC) chief executive member (CEM) M Laikaw-a'n a hmanpui.

M Laikaw chuan, Siaha khawpui chuan kum 2023-ah Mizoram puma khawpui fai inelnaah pathumna a nih hnuah kum 2024-ah pahnihna a ni thei chu hmasawnna ropui tak a nih thu a sawi a, "A lehpekah chuan pakhatna lawmman kan lak theih ngei ka beisei. Siaha khawpui faina tura thawh hlâwk tak kawngpui phiat faitute inpekna a fakawm a, state sorkar leh MADC thawhhona ṭhatzia a tilang a ni," a ti.

Inkhawmah hian MADC executive member (LAD) K Chhuabei leh Siaha district bawrhsap VL Hruaizela Khiangte te pawhin thu an sawi a ni.