KHAWTHLIR

Pawisa chawitir

Aizawl DC Office chuan, mihring tana ei him lo pek chhuah avangin Food Safety & Standards Act, 2006 tlawhchhanin Loisy's Room of Baking, Vaivakawn neitu (hmeichhia) chu pawisa chawi turin a ti. Aizawl Additional DC chuan, Loisy's Room of Baking neitu hi Rs 1,50,000 chawi tura tih a nih thu a tarlang.

Kuhva rah man

YMA, Vanzau Branch leh Dungtlang police-te chuan nimin khan Khawbung ram chhunga leiletah ram dang kuhva phur lirthei pahnih an man a, lirthei khalhtute - Lalawmpuia, Vaphai leh Lalchhuanpuia, Bungzung an man nghal. Vanzau Branch YMA chuan, an khaw ram chhungah dan loa kuhva phur lirthei kaltlang an phal loh thu leh, kal lui an awm a, man an nih chuan thuneitute hnenah an hlan zel dawn thu an tarlang.

Drug awareness

Mission Foundation Movement leh Indian Collaboration chuan nimin khan Adventist English School leh Electric Veng Middle School-ah ruihhlo ṭhat lohzia leh a laka fihlim theih dan tur inzirtirna an buatsaih. Inzirtirnaah hian thupui chu 'Effects of drugs' tih a ni. February 4, Thawhlehni khan Holy Child School-ah drug awareness an buatsaih bawk.

Bus tlan dawn lo

Lunglei district transport officer (DTO) R Lalrinzuali chuan hriattirna chhuahin, Lunglei leh Aizawl inkara MST bus tlan ṭhin chu VC/LC inthlanpui atan hman a nih dawn avangin February 10-14, 2025 chhungin a tlan dawn loh thu a tarlang a, mipui hriatthiamna a ngen.

Lakluh khap

Kolasib district magistrate Robert C Lalhmangaiha chuan thuchhuah siamin, African Swine Fever (ASF) leng mek chuan ziaawm lam pan rih mah se, ram dang leh state dang aṭangin vawk leh vawksa, frozen pork, vawksa rep leh vawksa aṭanga siam reng reng Kolasib district-ah lakluh khap a nih thu a puang a, "He hri hlauhawm tak laka vawk vulhtute leh mipuite kan him tlan zel theih nan thupek hi chhuah a ni," a ti.