Mipui duh thlan rap betah ZPM puh; ZPM chet dan democracy atan a him lo - MNF

MNF Legal Board chuan nimin khan Aizawl Press Club-ah thuthar thehdarhtute an kâwm a; mipui thlan local council (LC) leh village council (VC) laka ZPM kaihhruai sorkar chêt dan chu democracy tan a him lo nia sawiin, VC/LC inthlan turah ZPM paihthla turin mipui an ngen.

Mizo mipuiin August 2025 thlenga VC leh LC atana an thlante chu ZPM an nih loh avangin nam thlûk an nia sawiin MNF Legal Board secretary David R Lalsawmtluanga chuan, "An thuneihna thla ruk chuang lai mai an hnehchhuh ringawt hi mihring dikna chanvo inchhuhsakna sual lian tak a ni. Democracy rama la thleng ngai reng reng lo an ti mawlh mawlh mai hi kan ram kal zel tur atan a him lo. VC leh LC inthlanpui neih turah hian mipui duh thlanna rap bettu ZPM paihthla turin Mizo mipui kan ngen a ni," a ti.

David R Lalsawmtluanga chuan, ZPM-in an sorkar tirh aṭangin îtsîkna rilru kha tak nen ro an rel nghal nia sawiin, "Anmahni inhai vûrin bul an ṭan a, ti ve lo tur anga an insawite chu a duh hlei hlei an ni. MLA fund leh hamṭhatna an lak zozaite a rapthlak em avanga mipuiin kan hriat loh nan kawtthler hmun hrang hrangah mipui min bum nan an au nasa hle," a ti a; CMO aṭanga unit thlengin sum leh thuneih châka tuihâl an nihzia a lang niin a sawi.

Champhai leh Khawzawl district-a VC panga - Ngur, Hnahlan, Thekpui, Zawlsei leh Sialhawk VC-te awm ṭha hle hle lai an ṭhiat ringawt nia sawiin R Lalsawmtluanga chuan, VC pangate laka ZPM sorkar thil tih dik lo chu a hnuah mipui court leh law court-ah an chak loh phah thu a sawi a ni.

MNF Legal Board hruaitute chuan, "High Court rorelna viak ṭha tak Mizoramin nei lo phei ila chuan dictator sorkar hnuaia awm ang maiin Mizo mipui hi rahbehin kan awm dawn tih a chiang. High Court thupek awm reng chunga thuneihna an la hlan let duh lo hian court an zah lo hle tih leh lalna leh thuneihna âtchilh an nihzia a tilang chiang hle," an ti.

Nunrâwnna aṭanga thutlukna siam ṭhin a nih thu sawiin MNF Legal Board hruaitute chuan, "Mipui rorelna ṭhiattu ZPM hi paih thla ve zel turin Mizoram mipui kan sâwm," an ti a; Mizorama VC member 2,400 chuang leh LC member 360 chuangte hun (term) thla ruk chuanga tihtawi chu sawi mâm theih loh leh thutlukna nunrâwng tak niin an sawi.

MNF Legal Board hruaitute chuan, VC term tihtawi chu VC association president-in High Court-ah a khing mek tih sawiin, "January 30, 2025 khan Court-in VC lam leh sorkar lam thusawite a ngaithla tawh a, thutlukna nghah mek a ni chung hian ZPM sorkar chuan inthlang turin hma a la chho ve ngar ngar a ni," an ti a; zirlai exam hun laia VC leh LC inthlan hun ruat a ni chu mak an tih thu an sawi bawk.