District pathumah kângmei ven dan tur rêl

Lunglei, Champhai leh Saitualahte District Fire Prevention Committee-te nimin khan an ṭhukhawm a; February 10-15, 2025 chhunga kângmei vèn hapta (Fire Prevention Week) hman dan tur leh kângmei vèn dan tur an rêl.

Lungleiah chuan additional DC Rochuangkimi Khenglawt hoin PWD conference hall-ah an ṭhukhawm. Kumin ṭhál chhungin Lunglei district-ah kângmei venna lam media kaltlanga sawihona, thuchah leh inzirtirna hrang hrang tihchhuah te, sorkar pisaa thutiam sawi te, kohhran inkhawma thu puantir te, vantlang tlangauna hmanga inzirtirna puan leh reel insiamsiak leh intihsiakna dangte buatsaih tura ruahman a ni.

Kum 2024 chhung khan Lunglei district-ah ram kâng ṭum 12 a thleng a, ram hectare 29.95-a zau a kâng. Khawtlanga chhiattawh vanga lo hâl hun bawh pelh khaw pahnih tih loh chuan sorkar thupek angin March 15, 2024 hmain lo an hâl vek a ni.

Champhai DC conference hall-a ṭhutkhawmah bawrhsap VL Remliana'n kângmei chungchangah dan leh thupek khauh taka kenkawh a ṭul thu a sawi a, "Dan bawhchhiate an phû ang tâwka hrem a ṭul a, kângmei tichhuaktute lakah khauh zawka hmalak a nih theih nan ruahmanna felfai tak siam a ngai a ni," a ti.

Kângmei tichhuaktute'n an phu tâwka hrem an nih theih nan kângmei tichhuaktute lakah FIR thehluh ṭhin ni se, an ti. Kângmei tichhuaktute chu DFO Lalbiakchama Chawngthu (8974419028) leh DLAO Benjamin Zalawma Ralte (8826608104)-te hnenah report theih a nih thu leh report-tu hming thup a nih dawn thu an tarlang.

Saitualah pawh bawrhsap Dr Lalngura Tlau kaihhruaiin DC conference room-ah an ṭhu a; kângmei ven pawimawhna mipuite'n an hriat theih nan Saitual district mipui tan flyer leh video insiamsiak buatsaih an rêl.

Dr Lalngura Tlau chuan, kângmei chu thunun loh chuan a hlauhawm thu a sawi a, "Kângmei ven pawimawhna mipui hnena inhrilhriatna kawngah IEC (Information, Education & Communication) campaign a pawimawh," a ti a; DEO, IPRO, MJA leh khawtlang hruaitute chu theihtawp chhuaha hma la turin a ngen a ni.