Covid-19: Mizoram dinhmun Mizorama vei tawh zat 1,578

September 18, Zirtawpni khan Mizoramah Covid-19 vei mi 14 hmuh chhuah a ni a, September 19, Inrinni khan mi 30 hmuh chhuah leh a ni bawk. Mizorama hripui vei hmuh chhuah tawh zawng zawng chu mi 1,578 an ni. Inrinni leh nimin khan mi 29 chhuahtir an ni thung.

Mizorama Covid-19 vei hmuh chhuah tawh mi 1,578-te chu mipa 1,279 leh hmeichhia 281 an ni a; an zinga mi 1,002 (63.50%) an chhuak tawh a, mi 576 (36.50%) an la chhuak lo. La chhuahtir loh zingah hripui vei tawh lo an awm nual.

Sorkar thuchhuah tarlan danin, September 18-a hripui vei hmuh chhuahte chu - ZMC laboratory-ah mi paruk, Lunglei Civil Hospital (LCH)-ah mi panga, Serchhip District Hospital-ah pakhat leh, Rapid Antigen Test (RAT) hmangin Aizawlah pahnih an ni. Mi 14-te hi mipa 12 leh hmeichhia pahnih an ni a, Covid-19 symptom nei an awm lo.

Inrinnia Covid-19 vei hmuh chhuahte chu - ZMC-a hmuh chhuah pakhat, LCH laboratory-a hmuh mi 20, Kolasib District Hospital-a hmuh mi pahnih, Lawngtlai District Hospital-a hmuh mi pali, RAT hmanga hmuh chhuah Kolasib district-ah pahnih leh Mamit district-ah pakhat an ni.

Covid-19 positive enkawl zinga negative tawh leh dam tawh mi 29 chu Inrinni leh nimin khan chhuahtir an ni. Inrinni khan mi 17 an chhuak a, nimin khan mi 12 an chhuak ve leh bawk.

September 18 khan ZMC laboratory-a mi 1,244 swab sample endik zingah hripui vei mi paruk hmuh chhuah niin, Mizoram chhunga kai chhâwng (local positive contact) vek an ni a; Aizawl district mi vek, mipa pali leh hmeichhia pahnih, kum 15-41 inkar an ni.

Aizawl district-ah vêk Zirtawpni khan RAT hmangin Covid-19 positive mipa pahnih hmuh chhuah a ni a, BSF sipai pakhat leh Bihar aṭanga rawh lut niin, hnam dang ve ve an ni. BSF sipai hian Covid-19 symptom a nei tih sorkar thuchhuahin a tarlang.

TrueNAT-PCR hmangin Lunglei CH-ah hripui vei mipa panga, Assam Rifles mi leh sa vek hmuh chhuah a ni a; Serchhip Hospital laboratory-ah Prem Kram Infracon-a thawk mipa pakhat, Nagaland aṭanga rawn lut hmuh chhuah a ni bawk.

September 18, Zirtawpnia swab sample endik zat chu - ZMC-ah 1,244, district pariata TrueNAT laboratory-ah 212 leh RAT hmangin district pangaah 548 a ni a; a vaiin 2,004 a ni.

September 19, Inrinni khan ZMC laboratory-a swab sample endik tam ber ní a ni a, mi 1,504-te sample endik zingah hripui vei pakhat hmuh chhuah a ni. Hripui vei hmuh thar hi Tuikual North-a hnam dang mipa kum 24 mi, Vishal Megamart, Bawngkawna thawk, Covid-19 symptom a neih vanga sample endiktir a ni. Sorkar thuchhuah chuan, hripui a kaina hriat theih a nih loh thu leh tunah chuan symptom a lan tawh loh thu a tarlang.

Inrinni khan LCH TrueNAT laboratory-ah Covid-19 vei mi 20, (mipa 19 leh hmeichhia pakhat hmuh chhuah an ni a, hnam dang vek an ni. An zinga 17 chu Assam Rifles sipai, Kawmzawl quarantine facility-a awm mek an ni a; mipa pahnih leh hmeichhe pakhat dang chu civil mi, quarantine facility-a awm lai an ni thung.

Kolasib Hospital lab.-ah state páwn aṭanga rawn haw mipa leh hmeichhia pakhat ve ve hmuh chhuah a ni a, quarantine facility-a awm mek, symptom nei lo an ni. Lawngtlai Hospital-ah hnam dang mipa pali, India ramri bula kawng siam hna thawktute zinga mi hmuh chhuah a ni bawk.

Inrinni vêk khan RAT hmangin Bairabi screening centre-ah hnam dang truck driver/handyman pahnih hmuh chhuah a ni a; Mamit district-a Kanhmun screening centre-ah Tripura aṭanga rawn lut hmeichhia pakhat, Lawngtlai district-a cheng hmuh chhuah a ni.

September 19, Inrinnia swab sample endik zat chu - ZMC-ah 1,504, district pangaa TrueNAT laboratory-ah 132 leh RAT hmangin district pasarihah 108 a ni a; a vaiin 1,744 a ni.

Covid-19 vei dam tawh zinga September 19-a chhuahtir mi 17-te chu - State Referral Hospital aṭangin paruk, Berawtlang CCC aṭangin pakhat, Mamit CCC aṭangin pariat (mipa panga, hmeichhia pathum), Siaha CCC aṭangin pakhat leh Champhai DCHC aṭangin pakhat an ni.

Nimina chhuahtirte chu - SRH-ZMC aṭangin mi 11 leh SIRD, Lunglei Pukpui CCC aṭangin mi pakhat an ni a; SRH aṭanga chhuak zingah hian September 10-a positive hmuh chhuah, local council inthlana duty mi ṭhenkhat an tel.