Hnathial College-ah Literary Festival hmang

Hnahthial College Literature Club chuan nimin khan an college auditorium-ah Literary Festival an hmang a, district bawrhsap Rita Lalnunmawii Pachuau-in a hmanpui.

Literary Festival-ah hian 'Mizo history leh Sailo lal ropuite: Vandula leh Ropuiliani' tih lehkhabu zirho a ni a; Mizo Academy of Letters-in Book of the Year 2023 atana an thlan 'Pangparhnima' ziaktu Ahmangaihi Khiangte kawmna hun hman a ni bawk.

Chawhma lam hun chu Hnahthial College assistant professor Dr C Vanengmawii'n kaihruaiin, principal Lalsiam-thanga'n thu a sawi a; 'Mizo history leh Sailo lal ropuite: Vandula leh Ropuiliani' tih lehkhabu buatsaihtu, MZU History assistant professor Dr Laithangpuii, research assistant Laltlanthanga Pautu leh Zirnuntluanga bakah, Exodus Research Consultancy chairman Alfred Zothansanga Sailo ten an lehkhabu buatsaih chungchang an sawi.

Rita Lalnunmawii Pachuau chuan, ziakmite chàwm nun nan an thu ziakte chhiar a ṭul thu a sawi a, "Lehkhabu chhiar hi awmhmun aṭanga hmun leh hun ropui tak tak min fantirtu leh rilru tizautu a ni a, lehkhabu chhiar hi vawng nung zel turin theihtawp chhuah ang u," a ti.

Literary Festival-ah hian hian Hnahthial College zirlaite bakah, YMA Sub-Hqrs, Denglung YMA leh VC hruaitu te, MJA member te, MZP hruaitute leh ziakmite an tel a ni.