Zawlnuam bul ramria vènbûk kâng; Bru ho hâlah Vengpui-in an ngai

Zawlnuam Vengpui Village Task Force-in Covid-19 kaihhnawiha ramria vênbûk an siam chu a kâng a, Tripura-a Bru-te'n an hâl nia hriain, an thinrim thu, Vengpui VTF chuan an tarlang.

Nimina Zawlnuam Vengpui VTF secretary K Lalsangzuala hminga thuchhuah chuan, "Vengpui  VLTF ramri vênbûk, Tripura Tuikukte'n an hâl hi kan thin a rim tak zet a, ramri rawn kân rêng rêng dim an ni tawh lo ang, an chungah eng pawh thleng se an cho chhuaha ngaih tur a ni ang," an ti.

Ramria vênbûk hâl a nih chungchang chu thuneitu hnenah thlen a nih tur thu leh Mok kàia duty post hi sak ṭhat leh tur a nih thu sawiin, Zawlpui kawngah ngawrh lehzuala duty tur an indah dawn thu, Vengpui VTF chuan an tarlang.

Zawlnuam Vengpui VTF chuan, kawtchhuaha gate duty chu Zawlnuam pumpui huapa rel ṭhat a nih hma chuan tihtawp rih a nih dawn thu an sawi a, "Ramri duty a ngai anga kalpui zel tur a ni a, Tuikuk ramri rawn kân kan man ngei theih nan Zawlpui road-ah duty indah belh a ni ang. Duty routine buaipui turin YMA office bearer-te ruat an ni," an ti.

    Ṭiau (balu) Aizawl aṭanga lâk khap chu tihtawp a lo ṭul ta a, ṭiau hi zing dar 6 aṭanga tlai dar 6 thleng lak theih a ni. Driver-te khaw chhunga din khawmuan te, balu lâkna hmuna mi dang nen inawm pawlhte phal a ni lo.

    Sorkar inkaihhruaina zûlzuiin state chhung hmun hrang hrang aṭanga rawn haw leh rawn zinte khirh taka quarantine hi a rem loa ngaih a ni a, fimkhur thilah ni sarih tal tawmim tur erawh chuan kan inngen a ni. Test negative certificate nei tan inkhung a ngai lo.

    Kan khawtlangah ruihhlo a lo hluar leh tâk avangin, ruihhlo leh a kaihhnawih hrang hranga a ṭul anga hma la turin Vengpui JAC ngen an ni ang.

    Khaw dang aṭangin bungrua rêng rêng rawn sem kual phal a ni lo. Veng chhung mi, bungraw laa chhuakte an fimkhur hle tur a ni.