Railways hnathawkte dan tum

Hortoki khawtlang chuan, Kawnpui leh Hortoki inkar kawng chhia siam ṭhat a nih hma chuan, vawiin zing aṭangin tiam chin awm loin Hortoki ram chhunga Railways hna thawkte dan an tum thu an puang.

Hortoki khawtlang chuan, Hortoki leh Kawnpui inkar kawng, km. 17 chu Railways motor lian a tlân reng vang leh kawng bula lung an lakna min ṭhinin kawng a hnawh pin ṭhin avangin Hortoki mipuite'n an tuar hle tih an tarlang a; "Kolasib DC, Hortoki V/C leh Railways hotute'n a hmaa an inremna, mipui tan a harsatna siam lo tura an tih chu Railways lamin an bawhchhia a ni," an ti a; an khaw kawng chhia chu sorkarin siamṭha thuai se an duh thu an sawi.

Hetihlai hian Sairang leh Bairabi inkar Rel kawng an siam mekah leiverh tur 23 zinga pali zawh a ni tawh a, Nilaini khan a palina tur chu verh pawh a ni. Nilainia leiverh laihpawh tak hi Sushee Company laih niin, Khamrang ram chhung a awm a ni a, metre 206 a thui a ni.