Hostel kaihhruaina dan hmang ṭan tawh Aizawlah hostel 160 vel a awm

School Education department-in Mizorama hostel-te dan a siam, 'Rules and Regulation for Hostels in Mizoram' tih a hman tawh avangin hostel-te'n sorkar aṭangin phalna an neih a ngai tawh. Aizawlah sikul naupang awmna hostel 160 chuang a awm.

School Education hnuaia hostel rules & regu-lation hi June 1, 2016-ah hman ṭan a ni a; department chuan dan hnuai-ah hian hostel-te tan sorkar phalna leh pawmpuina (permi-ssion & recognition) dil turin hriattirna pawh a chhuah tawh.

Zawhna chhangin School Education director K Lalthawmmawia chuan, Aizawl leh khaw danga hostel awmte an zir chiang tawh tih a sawi a, Aizawl bikah sikul naupang awmna hostel 160 vel a awma an chhinchhiah tawh thu leh, an la lak khawm kim loh avangin 160 aia a tam a rinawm thu a sawi.

K Lalthawmmawia chuan, hostel chung-changa an dan siam hian sikul naupang 10 awmna chin a huam a, sikul naupang 10 aia tlem awmna leh college zirlaite leh hnathawkte awmna a huam tel lo tih a sawi bawk.

Dan thar hnuaiah hian hostel-te chuan Hostel Managing Committee an din vek tur a ni a, kum thum danah din thar zel tur a ni.

Committee-ah chuan hostel awmna khua/venga VC/LC member pakhat tal an awm tur a nih bakah, hostel-a awm nu leh pate aiawh pakhat tal an tel tur a ni; a khát tâwkin hostel an enfiah ṭhin tur a nih bakah, kum khatah vawi hnih tal an ṭhukhawm tur a ni.

Hostel din tur reng rengin School Education department aṭangin phalna a la hmasa tur a ni a, phalna nei loin hostel din phal a ni tawh lo. Dan awm hmaa hostel awm tawhte pawhin phalna an dil tur a ni a, sorkarin a pawm theih chuan provosional permission an pe phawt ang a; kum hnih chhungin sorkarin dan a zamte an zawm vek theih hnuah recognition an pe thei chauh dawn a ni.

Hostel chu a chhunga awmte tan a him ṭha tawk tur a ni a, hostel-a lut duhte chu sakhua, hnam leh pianna hmunte avanga hnar phal a ni lo. Power supply, hosteller-te mutna leh bungraw dahna, zirlai tan lehkha zirna, choka, infiamna leh intihhlimna, tui, inthiarna, insûkna, an chhungte nena inkawmna ṭhate a awm tur a ni. Hostel chu mipa leh hmeichhiate building khatah an awm a nih pawhin, an awmna floor chu a hrangin a ni tur a ni a; inthununna khawng taka kenkawh tur niin, intihduhdahna (ragging) a awm tur a ni lo a; ei leh in pawh ṭha pangngai tak chhawp tur a ni bawk.

Hostel chu mi pakhat talin full time-in a enkawl tur a ni a, mi pakhatin mi 50 aia tam a enkawl tur a ni lo. Elementary education zirlaite awmna hostel chu pawl 12 tal pass-in enkawl se, pawl 12 pass tawhte awmna hostel chu graduate tal pass (duhthusamah chuan B.Ed zo)-in enkawl se, tih a ni.