CM-in Digital India Week a hawng Huapzo hmasawnna kan kalpui mek: Hawla

Digital Inida Week chu nimin khan district khawpui hrang hrangah hawn a ni a, Aizawlah chuan chief minister Lal Than­hawla'n Assembly Annexe conference hall-ah a hawng. CM chuan, sorkarin hmasawnna huapzo a kalpui mek niin a sawi.

Digital India Week hawn in­khawm hi Information & Commu­nication Technology (ICT) secre­tary C Lalhmachhuana'n a kaihruai. Chief Minister chuan, "Sorkarin hmasawnna huapzo a kalpui mekah hian sorkar kan ṭanpui hi kan mawh­phurna a ni. Sorkar hnathawkte pawhin theihtawp chhuah hi kan mawh­phurhna a ni tih i hre thar ang u," a ti.

Lal Thanhawla chuan, infor­mation technology (IT) chu hman sual theih a ni tih sawiin, "Hman nasat lutuk avangin pawi khawih theih a ni. Mahni duh dana inhrîk­thlâkna atana hman leh mi elrèlna atan ringawta hmante hi a ṭha lo," a ti a; IT chu a dan hnuaia hman thiam a pawimawh thu a sawi.

CM Hawla chuan Digital India Week chu week hman chhung ringawt ni lo, kum tluana kalpui ṭul a tih thu a sawi a, "Week hrang hrang kan hmang a, week hman a nih chhung chiah kan buaipui ṭhin. Hei hi a ṭha lo," a ti.

Chief Minister sawi danin, mihring hriselna atan mobile tower a him lo nia insawiṭhaih a awm avangin company-te'n tower bunna tur an hmu zo lo ṭhin a; hei vang hian Mizoramah internet a chak theih loh phah a ni. Mobile tower chu mihring hriselna atan a ṭhat leh ṭhat loh finfiah a la ni lo.

Digital India Week-in a tum ber chu, India khua leh tuite tunlai thiamna hmang ṭangkai thei tur khawpa chher chhuah a, an thiamna hmanga India ram kalphung thara kaltir a ni. India ram chu kum lo la awm leh zel tura hma a sawn theih nana ruahmanna a ni a, rahbi tharah tunlai thiamnate chu hmun pawimawh chantir a tum.

Week hawnnaah hian chief minister chuan department leh mipuite hman theih tur e-service chi hrang hrang paruk a hawng nghal a, chungte chu - CM Online, e-District State Roll Out Project, State Service Delivery Gateway, Inventory Management System, Excise & Narcotics department network leh Online Property Return Software-te a ni.