Congress party kaihhruai sorkar hi a Zungpui a tlu kar tawh: Zoramthanga

MNF president Zoramthanga chuan, Congress party kaihhruai sorkar chu a zungpui a tlu kar tawh nia sawiin, "Tun aṭanga kum 10-ah chuan Congress hian ZNP pawh an tiat tawh lo hianin ka ring," a ti.

MNF Champhai North Block 1-in nimina Champhai Town Hall-a conference an neihah thu sawiin, Zoramthanga chuan, "Congress sorkar hi a zungpui a tlu kar tawh a, kohhran leh khawtlang duh loh zu an zuar a, bán sawm nei hmaah puja-in, Pathian pawi an sawi a, hei vang hian a tluchhe mek a ni," a ti a; Congress sorkarin kum riat dáwn Mizoram an enkawl tawh chhungin zahthlak khawpin hmasawnna hna thawh an nei lo niin a sawi.

MNF President chuan, Mizoram hmun tinah kawng a chhe em em nia sawiin, "Ruahsur, kawng chhia leh Congress hi a inhmeh em em a ni. Tuna Champhai kawng National Highway liana siam tura inchhawp pawh hi Congress hian a siam ka ring lo a, MNF-in kan sorkar hunah ṭha takin kan siam ang," a ti.

MNF thuchhuah chuan, Zoramthanga hian Ngaizawl, Zote, Kahrawt, Ngur, Hmunhmelṭha, Rahsi Veng, Awmpui Veng, Vengthlang, North Khawbung leh Vengsang aṭangin MNF zawm thar 322 a lawm lut niin a tarlang.

Hetih lai hian, MNF ṭhalai hruaitute nimina ṭhukhawm chuan resolution siamin, "MNYF-te'n buhfai supply danah thil dik lo a awm thu kan sawi ṭhin chu Gauhati High Court-in insawifiah tura Mizoram sorkar a ko ta hi a dikzia tichiangtuah kan ngai," an ti.

MNYF resolution chuan, gas tichingpentu Central YMA-in an mante tun thlenga Mizoram sorkarin a la hrem lo chu mak an tih thu sawiin, "Mizoram sorkarah corruption a tlangnêlzia tarlannaah kan ngai," a ti a; Mizoram sorkar hnuaia college-ah politician-te thu sawi tura sâwm khap a ni chu thuneihna hman sualna lian taka an ngaih thu sawiin, order sût turin sorkar an phût.

MNF ṭhalaite chuan, Independence Day lawmnaa sikul naupangte an tlûk zawih zawih laia Chief Minister-in ngaihsak loa politics a sawi khum ngar ngar chu mak an tih thu an tarlang a; minister Lalsawta'n a bial Aizawl East-II chhunga sorkar hnathawk GP Fund lak chhuah dilte chu Chhinga Veng local council bye-election neih tura Congress candidate recommendation la turin a lo phût niin an sawi bawk.