Sorkar hmalaknaah MPYCC an lâwm

Congress party ṭhalaite chuan nimin khan thuchhuah siamin, swab sample endik man tihniam tura rawtna a awm leh private hospital leh laboratory-ah swab test tih theih tura ruahmanna siam a ni chu lawmawm an tih thu an tarlang.

Congress ṭhalaite chuan, September thla ni 15 leh ni 17-ahte khan MPYCC president-in thuthar thehdarhtute a kawmnaah, Mizoram sorkar chu state dang anga private hospital leh laboratory-ahte swab test phal tur a ngen thu an sawi a, "Mizoram sorkar chuan Dt. 18/9/2020 khan Mizoram Gazette tichhuakin, private hospital leh laborator-te Covid-19 test a phalsak ta hi lawmawm kan ti hle," an ti.

MPYCC chuan, vawi tam tak press release leh press conference kaltlanga an party-in sorkar an nawrna, 'Mahni duh thua Covid-19 test duhte tan RT-PCR test man Rs. 4,500 chu a to lutuk avangin mipui ban phâk Rs. 2,500 hnuai lam tal ni rawh se' an tih ṭhin chu tihhlawhtlin tuma hmalak a nih avangin lawmawm an tih thu an tarlang.

MPYCC tarlan danin, swab test man tihniam dan turah Covid-19 Me­dical Operational Team chairman Dr ZR Thiam­sanga, MLA-in sorkarah rawtna an thlen dawn. Covid-19 Medical Ope­rational Team-in an rawt dan MPYCC-in an tarlan chu - RT-PCR ah Rs. 2,500 leh RAT-ah Rs. 700 a ni.