Aizawlah cable liner siam dan ngaihtuah

Aizawlah cable liner hmanga veivahna siam tum a ni a, chumi atana master plan siam turin sorkar laipui chuan USA company CDM Smith a thlang. CDM Smith hian Aizawla hmalak dan tur an rawn zir chiang ang.

Nimin khan CMO conference hall-ah sorkar mi pawimawhte'n Aizawl khawpui tâwt lutuk tihziaawm dan tur an sawiho a; PWD secretary Lalramthanga chuan Aizawla traffic jam nasa lutuk sukiang tura kawng hrang hranga hmalak a nih dan a tarlang.

Lalramthanga sawi danin, kawngpui tihzauh belh ngaihna a awm tawh loh avangin lei hnuai rél (subway car), cable car leh monorail-te tih theih dan a awm leh awm loh ngaihtuah a ni a, tih theih dan tur kawng dap a ni.

Mipuiin sum tam tak sêng loa veivahna ṭha zawk an neih theihna tur leh Aizawl khawpui leilung nena inhmeh ber tur thlir chungin, khawl hmanga mipui vahvelna tur Automated People Mover (APM) hrang hrang zingah cable liner chu zir chian ṭha tih a ni.

Cable liner siam a nih theih nan Mizoram sorkar chuan Finance Ministry-a Department of Economic Affairs (DEA) a dawr a, Asian Development Bank sum hmangin khawpuia mipui vahvelna, urban transport-a harsatna sukiang turin hma lak ṭan dan tur an ngaihtuah a ni.

DEA leh ADB-te nen hian hun rei tak inbiakna neih a nih hnuah Master Plan siam turin US com­pany pakhat CDM Smith chu thlan a ni ta a ni.