KHAWTHLIR
Thisen pe
Salvation Army Founders Day vawi 150-na lawm nan Salvation Army Youth-te chuan nimin khan thisen unit 118 an pe. SAY Central South Division hnuaia Saitual area chuan Aizawl Civil Hospital tan thisen unit 80 an pe a, a petute mipa 72 leh hmeichhia pariat an ni. Serchhipa SAY member mipa 23 leh hmeichhia pasarihte'n Serchhip District Hospital-ah unit 30 an pe a; Lungleia SAY member mipa pasarih leh hmeichhia pakhatte'n Lunglei Civil Hospital-ah unit riat an pe bawk.
MJA workshop
Digital India Week hmanna kal mekah, vawiin hian MJA member-te pualin IPR Auditorium-ah workshop buatsaih a ni dawn a; MJA general headquarters chuan MJA member Aizawla awm mekte chu tel vek turin a chah.
Pawisa lem man
Aizawla Customs department leh BSF ṭangkawp chuan nimin tlai khan Falkland Venga World Bank Road-ah Rs 1,000 note lem 970 an man a, a neitua puh Lalramchuana (26) s/o Zarzoliana, Bawngkawn nia insawi an man tel bawk. Pawisa lem hi Bangladesh aṭangin Badarpur, Assam kal-tlanga lakluh a ni.
Heroin man
Excise & Narcotics department-a Anti-Narcotics Squad chuan, July 1, 2015 tlai dar 4 khan heroin gram 38 leh a neitu Lalrindika (35) s/o Dingthanga (L), Tuidil, Myanmar inti an man a; NDPS Act 1985 hmangin thubuai an siamsak.
Aizawl Master Plan Vision 2030 zir
Nimin khan AMC pisa conference hall-ah AMC councillor-te tan Aizawl Master Plan Vision 2030 chungchang hrilhfiahna hun hman a ni a, AMC chairman CT Zakhuma'n a ho. Zirhonaah hian town planner F Lalhmingliana'n Aizawl Municipal (Master Plan and Zonal Development Plan) Regulations, 2015 duan a sawifiah a ni.