Truck driver-te lungawi loin Bawngkawnah kawng an dang

Truck driver/handyman eng emaw zatte chuan nimin tlai dar 5 vel aṭang khan Bawngkawnah kawngpui an dang. He thu ziah lai thleng hian buaina chinfel a la ni lo a, kawngpui an la dang zel rih.

Thu dawn danin, truck driver/handyman-te lungawi loh chhan hi, nimin chhûna police ṭhenkhatin truck driver pakhat, no entry dan bawhchhia nia sawi kut an thlâk vang a ni. Truck driver hian no entry a ni chungin khawpui chhungah motor a khalh lut niin an sawi.

Vanglaini palai zawhna chhángin Aizawl SP C Lalruaia chuan, truck driver-te'n tlai dar 5 vel aṭangin Bawngkawnah kawngpui an dan thu leh, nimin tlai dar 6:20 thleng kha chuan truck 20 vel an din khawm thu a sawi.

Bawngkawn Police Station aṭanga thu dawn danin, nimin tlai dar 6:30 vela khan police hotute leh truck driver pawl hruaitute an inbe mek a, an inbiak dan erawh hriat hman a ni lo.

Bawngkawn PS-a duty-te sawi danin, truck driver hian a truck khalh chu police-te'n ding tura an ti chungin ding loin Ramhlun lamah a tlân tlang a, Ramhlun North-ah police dangin lo tidingin, an man a, Bawngkawn lamah an hruai a ni. Truck driver hi man zui a ni lo a, thubuai siamsak a ni lo.

Hetihlai hian PRISM party ṭhalai chuan thuchhuah siamin police-te‘n driver kut an thlak chu an dem thu an tarlang a ni.