Natna benvawn enkawlna thlirlet 2014-15 ah NCD clinic-ah mi 23,947 inentir

National Programme for Prevention and Control of Cancer, Diabetes, Cardiovascular Diseases and Stroke (NPCDCS) chuan nimin khan IPR Conference Hall-ah review meeting leh training an nei.

Mizoram pumah NPCDCS clinic hrang hrangah kum 2014-15 chhung khan mi 23,947 an inentir a, mi 5,772 chu enkawl zui an nih thu an tarlang.

National Health Mission (NHM) hnuaia natna benvawnte enkawlna, NPCDCS review meeting hi Hospital & Medical Education director Dr Lalbiak Kima'n a kaihruai a; khuallian, Health director Dr K Ropari chuan, khawvel changkang zelah nunphungin a zir loh vanga natna benvawn - cancer, zunthlum, lung natnate vei leh thihpui an tam ta tial tial thu a sawi a, "Heng natna veitute enkawl kawngah thawktu hrang hrangte ṭanrual ṭhat a ngai hle a ni," a ti.

NPCDCS state nodal officer Dr Eric Zomawia'n sawi hawnna hun hmangin, awm âwl lutuk leh taksa sawizawi ngai loh vang te, mawm leh thlum ei nasat lutuk vang te, chi ei tam lutuk vang te, thlai leh thei ei tlem vang te, vaihlo tih nasat vang leh zu in nasat vangtein cancer, zunthlum, lung natnate vei an tam thu a sawi.

Dr Eric Zomawia chuan, natna benvawn ang chi dona turin NPCDCS-in CMO pisa tinah NCD Cell an siam a, district hospital leh CHC-ahte NCD Clinic dah a nih thu a sawi a; NCD Clinic-ahte chuan zunthlum, thisen sang, lung ṭha lo leh cancer vei leh vei loh an lo endiksak ṭhin tih a sawi bawk.

NPCDCS programme officer Dr Lalruatdiki sawi danin, sorkar kum liam ta April 2014 - March 2015 chhung khan district hrang hranga NCD clinic-ah mi 23,947 an inentir a, chung zinga mi 5,772 chu natna nei hmuhchhuah leh enkawl zui an ni.

Enkawl zinga mi 3,512 chu zunthlum an ni a, mi 2,119 chu hypertension natna nei niin, lung natna vei mi 85 leh cancer vei mi 56 an tel. Cancer vei mi 15 chu chemotherapy tihsak an ni a, mi 2,914 chu counselling pek niin, mi 617 chu physiotherapy tihsak an ni.

Review meeting-ah hian Aizawl, Lunglei, Saiha leh Champhai district-a NPCDCS hnuaia thawkte an tel a, NCD clinic leh NPCDCS dinhmun sawiho a ni. Specialist doctor-te'n thil pawimawhte an sawi a; vawiinah chhunzawm a ni ang.